Եվրամիության շուկաներ ազատ մուտքի դիմաց Հայաստանը պետք է ապահովի մարդու եւ աշխատանքային իրավունքների ստանդարտները: Այս մասին հունիսի 20-ին` լրագրողների հետ հանդիպման ժամանակ ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Նրա խոսքով` Բրյուսելից շատ կարեւոր առաքելություն է ժամանել Երեւան` GSP+ ռեժիմի հետ կապված Հայաստանի առաջընթացի մոնիթորինգ անցկացնելու: Նա հիշեցրեց, որ Հայաստանն այս ռեժիմին միացել է ավելի քան 3 տարի առաջ: «Ձեզանից ոմանք կարող են հարցնել` Եվրամիությունն ինչպե՞ս է իրականացնում Հայաստանում մարդու իրավունքների եւ աշխատանքային իրավունքների կոնվենցիաների կատարման մոնիթորինգը: Սա, սակայն, Հայաստանի եւ Եվրամիության միջեւ գործարքի մի մասն է: Մեր կարծիքով` սա win-win իրավիճակ է»,- նշեց Սվիտալսկին` շարունակելով, որ այս ռեժիմը նպաստում է Հայաստանում բարեփոխումների խորացմանը:
«Սա բարեկամական առաքելություն է, սա հետաքննության առաքելություն չէ: Գործարքը միանգամայն հստակ է. Եվրամիության շուկաներին հասանելիության դիմաց յուրաքանչյուր երկիր պետք է ապահովի մարդու իրավունքների եւ աշխատանքային իրավունքների ստանդարտները: Թույլ տվեք հիշեցնել, որ եվրոպական շուկաներ են ազատ մատակարարվում ավելի քան 6 հազար հայկական ապրանքներ: Եվ, իհարկե, դրական գնահատման դեպքում դեռեւս կա Հայաստանի եւ մասնավորապես հայ արտահանողների համար GSP+ ռեժիմն ավելի արդյունավետ դարձնելու հնարավորություն»,- ամփոփեց Պյոտր Սվիտալսկին: