Եվ վարչապետը, եւ ԱԺ «Ելք» խմբակցության պատգամավորները հունիսի 20-ին Ազգային ժողովում  հանդիպելու փոխադարձ ցանկություն են ունեցել, պարզապես Ազգային Ժողովի նախագահ Արա Բաբլոյանը չի կարողացել կազմակերպել: Այս մասին այսօր՝ հունիսի 21-ին, Ազգային ժողովում հայտարարեց «Ելք» խմբակցության ղեկվար Նիկոլ Փաշինյանը:

«Ստացվում է՝ եւ վարչապետը, եւ մեր խմբակցությունը հանդիպելու փոխադարձ ցանկություն են ունեցել, սակայն, ում միջոցով որ խոսակցությունը տարվել է՝ պարոն Բաբլոյանի, գուցե այդքան էլ ճիշտ չի հասկացել կողմերին: Պարոն Բաբլոյան, Դուք հիշատակեցիք ձեր օգնականին, գուցե իսկապես նման լուրջ հարցերը Ձեր օգնականին հանձնարարեք, նա հնարավոր է՝ ավելի լուրջ հմտություններ ունենա՝ նման բարդ հարցեր կազմակերպելու»,-ասաց պատգամավորը:

Նիկոլ Փաշինյանն ավելացրեց, որ   ԱԺ «Ելք» խմբակցությանն առաջարկվել է «Ծառուկյան» դաշինքի հետ միասին վարչապետի հետ հանդիպում ունենալ, սակայն, մերժել են:

«Մենք ասել ենք, որ ընդունելի չի, որովհետեւ, եթե հիմա նայեք հերթագրվածների ցուցակին, կտեսնեք, որ «Ծառուկյան» դաշինքի եւ «Ելք» խմբակցության համատեղ հանդիպումն է վարչապետի հետ: Մյուսներն ինչու համար են եկել, նույնիսկ դժվար է պատկերացնել՝ բացառությամբ Սեդրակ Սարոյանի»,-ասաց նա:

Ավելի վաղ NEWS.am-ը հայտնել էր, որ «Ելք» խմբակցության քարտուղար Գեւորգ Գորգիսյանը հայտարարել էր, որ իրենց խմբակցության հետ վարչապետ Կարեն Կարապետյանը չի հանդիպել, փոխարենը կառավարությունից խմբակցությանն առաջարկել են ծրագիրը քննարկել փոխվարչապետ Վաչե Գաբրիելյանի հետ։ Նշենք, որ վարչապետը ծրագիրը ներկայացրել է «Ծառուկյան» եւ ՀՀԿ խմբակցություններին, իսկ ավելի վաղ ՀՅԴ ներկայացուցիչներին է ներկայացրել այն։