Լեռնային Ղարաբաղի Հանրապետության պաշտպանության նախկին նախարար Սամվել Բաբայանին նոր մեղադրանք է առաջադրվել: Այս մասին այսօր՝ հունիսի 21-ին, NEWS.am-ի հետ զրույցում ասաց Սամվել Բաբայանի շահերի պաշտպան Ավետիս Քալաշյանը: Նա նշեց, որ իր պաշտպանյալին հերթական անգամ անհիմն մեղադրանք է առաջադրվել:
Պաշտպանի խոսքով, Սամվել Բաբայանին մեղադրանք է առաջադրվել ՀՀ քրեական օրենսգրքի 190-րդ հոդվածի 1-ին մասի (պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով, կամ ազատազրկմամբ՝ առավելագույնը չորս տարի ժամկետով եւ տուգանքով՝ նվազագույն աշխատավարձի առավելագույնը հիսնապատիկի չափով կամ առանց դրա) հատկանիշներով՝ փողերի լվացում: Թե ինչքանով առաջադրված նոր մեղադրանքը կապ ունի Հայաստան «Իգլա» բերելու հետ, պաշտպանը նշեց, որ իր պաշտպանյալին առաջադրված մյուս մեղադրանքների հետ նոր մեղադրանքը կապ չունի:
«Առայժմ չեմ կարող ասել, թե ինչու են այս մեղադրանքն առաջադրել: Այս մեղադրանքը անհիմն է եւ ինչպես մյուս մեղադրանքները, այնպես էլ սա իմ պաշտպանյալը չի ընդունում»,-ասաց նա:
Ավելի վաղ տեղեկացրել էինք, որ «Իգլայի» գործով կալանավորվածներ Արցախի պաշտպանական բանակի նախկին հրամանատար Սամվել Բաբայանին եւ ազատամարտիկ Սանասար Գաբրիելյանին առաջադրված մեղադրանքները նախաքննության ավարտին մեղմացվել են: Նրանց առաջադրված մեղադրանքներից հանվել է ՀՀ ՔՕ 235.1-րդ հոդվածի 2-րդ մասի 1-ին կետը ՝ Ռազմամթերքի մաքսանենգություն, նրանք այժմ մեղադրվում են միայն ՀՀ ՔՕ 235 հոդվածի 2-րդ մասի հատկանիշներով՝ Ապօրինի կերպով զենք, ռազմամթերք ձեռք բերելը, կրելը կամ փոխադրելը, որոնք կատարվել են մի խումբ անձանց կողմից՝ նախնական համաձայնությամբ՝ Այն պատժվում է ազատազրկմամբ՝ երեքից յոթ տարի ժամկետով՝ գույքի բռնագրավմամբ:
NEWS.am-ի հետ զրույցում Սանասար Գաբրիելյանի պաշտպան Կարապետ Աղաջանյանը նշել է, որ իր պաշտպանյալն իր ցուցմունքում ասել է, որ «Իգլան» փորձել է գնել Զինված ուժերի համար, նա պատվիրել է, որպեսզի այն արտասահմանից ներմուծեն: Ըստ նրա ցուցմունքի՝ «Իգլան» ներմուծող անձանցից է եղել գործով կալանավորված 3-րդ անձը՝ Արմեն Պողոսյանը, որը այն Հայաստանից է ձեռք բերել եւ փորձել է գումարի դիմաց վաճառել Սանասար Գաբրիելյանին: Իսկ Սամվել Բաբայանն իր խորհուրդներով փորձել է օգնել Սանասար Գաբրիելյանին՝ Զինված ուժերի համար «Իգլան» գնելու հարցում: