ԵՏՀ Կոլեգիան հաստատել է ապրանքների հայտարարագրերի (ԱՀ) լրացման կարգում փոփոխությունները, որոնք արտադրվել են ազատ տնտեսական գոտիներում (ԱՏԳ) եւ Հայաստանում ու Բելառուսում թողարկվում են ազատ շրջանառության համար: Փոփոխությունները կապված են նման ապրանքների կարգավիճակի որոշման նոր կանոնների հետ, որոնք ԵՏՄ տարածքում գործում են 2017 թվականի հունվարի 1-ից, հայտնում են ԵՏՀ մամուլի ծառայությունից:
Նոր կանոնների համաձայն` ԱՏԳ-ում արտասահմանյան ապրանքների օգտագործմամբ արտադրված արտադրանքը ԵՏՄ մաքսային տարածքի մյուս հատվածներ ներկրելու դեպքում ներքին սպառման համար ենթակա է թողարկման մաքսային ընթացակարգի: Այս ընթացակարգով նախատեսվում է ներմուծման մաքսատուրքի եւ հարկերի վճարում, որոնք դուրս են գրվում պատրաստված (ստացված) արտադրանքի բաղադրության մեջ մտած արտասահմանյան ապրանքների համար, եթե հնարավոր է արտասահմանյան բաղադրիչի նույնականացումը: Իսկ եթե դա անհնար է, մաքսային վճարումները դուրս են գրվում պատրաստված ամբողջ արտադրանքի համար:
Նույնականացման բացակայության դեպքում ԱՀ 40-րդ սյունակում (ԱՀ գրանցման համարը) տեղեկությունների նշման նպատակահարմարությունը վերանում է: Սրա հետ կապված բելառուսական կողմի նախաձեռնությամբ, որին աջակցել է նաեւ Հայաստանը, ԵՏՀ Կոլեգիան արտաքին տնտեսական գործունեության կողմերին այս սյունակը չլրացնելու հնարավորություն է ընձեռել այսպիսի ապրանքները Հայաստանում եւ Բելառուսում հայտարարագրելիս: Համանման մոտեցում արդեն կիրառվում է Ռուսաստանում: