ԵՏՀ Կոլեգիան հավանություն է տվել ԵՏՀ-ի եւ Հունաստանի կառավարության համագործակցության մասին Համատեղ հռչակագրի նախագծին, որը կստորագրվի հունիսի 23-ին Մոսկվայում, հայտնում են ԵՏՀ մամուլի ծառայությունից:
Հռչակագրով փոխգործակցություն է նախատեսվում ԵՏՀ իրավասությանը փոխանցված հարցերում, ինչը թույլ կտա համակարգել փոխադարձ առեւտրի մեծացման եւ տնտեսական համագործակցության ոլորտում համատեղ միջոցառումների անցկացման ջանքերը: Մասնավորապես 2017-ի աշնանը ծրագրվում է «Հունաստան-ԵՏՄ» գործնական համաժողովի անցկացումը:
ԵՏՀ Կոլեգիայի նիստում հավանության է արժանացել «Հակակեղծում» միջազգային համաժողովի վերաբերյալ կանոնադրության հաստատման մասին» Հանձնաժողովի Խորհրդի որոշման նախագիծը: Կանոնադրության նախագիծը մշակել է Հանձնաժողովը եւ համաձայնեցրել անդամ երկրների հետ: Փաստաթղթում ներկայացված են համաժողովի անցկացման նպատակները եւ խնդիրները, ինչպես նաեւ ֆինանսավորման հարցերը:
Այս տարվա մարտին Եվրասիական միջկառավարական խորհուրդը հավանություն է տվել միջազգային համաժողովի անցկացմանը` ամենամյա, ռոտացիոն կարգով: Համաժողովի կազմակերպման եւ միջոցառումների անցկացման գործը հանձնարարվել է Միության այն երկրին, որի ներկայացուցիչը նախագահում է Եվրասիական միջկառավարական խորհրդում:
Համաժողովի նպատակների եւ խնդիրների թվում է իշխանության, բիզնեսի, գիտության, իրավատերերի, արտադրողների, հեղինակների եւ հասարակայնության ներկայացուցիչների կառուցողական երկխոսության ապահովումը: Սա պետք է նպաստի անդամ երկրների մոտեցումների եւ առաջարկների համակարգմանը` կեղծ արտադրանքի տարածման դեմ պայքարի արդյունավետության բարձրացման, ինտելեկտուալ սեփականության օբյեկտների իրավունքների պաշտպանման եւ ապրանքների ու ծառայությունների քաղաքակիրթ շուկայի ձեւավորման վերաբերյալ: 2017 թվականին համաժողովի անցկացման ժամանակ հատուկ ուշադրություն կդարձվի արտադրանքի որակի եւ անվտանգության վերահսկման արդյունավետության բարձրացման, ապրանքաշրջանառությանը հետեւելու համակարգերի ստեղծման, շուկաների պաշտպանության մաքսային մեթոդների կատարելագործման հարցերին:
