ԵԽԽՎ օրակարագում ներկայումս առաջնահերթություն է ԵԽԽՎ նախագահ Պեդրո Ագրամունտի պաշտոնանկության գործընթացը, որին նա ընդդիմանում է բոլոր հնարավոր եղանակներով` ընդհուպ վիճարկելով Էթիկայի հանձնաժողովի որոշումը: Այս մասին այսօր՝ հունիսի 21-ին, ԱԺ-ում լրագրողների հետ զրույցում հայտարարել է ԱԺ փոխնախագահ, ԵԽԽՎ հայկական պատվիրակության ղեկավար Արփինե Հովհաննիսյանը:
Նրա խոսքով, կանոնակարգի հարցերով հանձնաժողովը նախաձեռնել է փոփոխություններ, որպեսզի հնարավոր լինի պաշտոնանկության գործընթաց սկսել ԵԽԽՎ պաշտոնյաների նկատմամբ, այդ թվում ԵԽԽՎ նախագահի. այդ նոր կանոնակարգը պետք է հաստատվի լիագումար նիստում, որից հետո գործընթացի մեկնարկը կտրվի. «Հայկական պատվիրակությունն այս հարցում բազմաթիվ անգամ իր դիրքորոշումն արտահայտել է եւ որեւէ փոփոխություն չկա»,-ասաց ԱԺ փոխնախագահը՝ ձեռնպահ մնալով կանխատեսումներ անել կապված Ագրամունտի պաշտոնանկության հետ:
Արփինե Հովհաննիսյանը նշեց, որ կառույցում հայկական պատվիրակության մարտավարությունը դեռ քննարկվելու է, որոշ մոտեցումներ կփոխվեն, որոշները կմնան նույնը: