Ստեփանակերտից հունիսի 19-ին Երեւան ՊՆ կենտրոնական կլինիկական զինվորական հոսպիտալ տեղափոխված Յուրի Զաքարյանի վիճակը շարունակում է կայուն ծանր մնալ: Այս մասին NEWS.am-ին ասաց Պաշտպանության նախարարության ռազմաբժշկական վարչության պետ, գնդապետ Կամավոր Խաչատրյանը:
«Զինծառայողը դեռեւս միացված է արհեստական շնչառության ապարատին, կփորձենք առաջիկա օրերին արդեն անջատել ապարատը»,- ասաց Կամավոր Խաչատրյանը:
Զինծառայողը ստացել է գլխի հրազենային թափանցող վիրավորում: Հունիսի 17-ին վիրավորված ժամկետային զինծառայողը Երեւան է տեղափոխվել երկու օր անց:
Հոսպիտալում է գտնվում նաեւ հունիսի 16-ին վիրավորված ժամկետային զինծառայող Արմեն Վարդանյանը: Նա ականի պայթյունից գլխի շրջանում էր վիրավորում ստացել: Կամավոր Խաչատրյանի խոսքով, զինծառայողի գլխում բեկոր է մնացել, դեռեւս վաղ է ասել՝ նա վիրահատության կենթարկվի, թե ոչ:
Հիշեցնենք, որ հունիսի 16-ին եւ 17-ին հակառակորդի սադրանքների հետեւանքով հայկական կողմն ունի 4 զոհ եւ 3 վիրավոր:
Մասնավորապես, հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.): Կան երկու վիրավորներ՝ Մյասնիկ Հովհաննիսյանը, որը գտնվում է Մալայանի անվան Ակնաբուժական կենտրոնում եւ 20-ամյա Արմեն Հարությունի Վարդանյանը, որը ՀՀ ՊՆ Կենտրոնական կլինիկական զինվորական հոսպիտալում է գտնվում:
Հաջորդ օրը՝ հունիսի 17-ի առավոտյան ադրբեջանական կողմը հյուսիսային ուղղությամբ դիմել է հերթական սադրանքի, որի հետեւանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Տիգրանի Գասպարյանը: Վիրավորվել է Յուրի Արմենի Զաքարյանը: