Վարչապետ Կարեն Կարապետյանին ուղեկցում էր Սամվել Ալեքսանյանի աղջիկը, որը այդ կազմակերպության սեփականատերն է: Այս մասին այսօր՝ հունիսի 22-ին, Ազգային ժողովում լրագրողների հետ զրույցում ասել է տնտեսական զարգացումների եւ ներդրումների նախարար Սուրեն Կարայանը՝ անդրադառնալով Կարեն Կարապետյանի՝ «Ալեքս գրուպ» կատարած այցին, որտեղ լուսանկարներում երեւում է նաեւ Սամվել Ալեքսանյանը, սակայն ավելի ուշ այդ լուսանկարները հեռացվել են:
Այսօր ԱԺ-ում լրագրողները նախարար Կարայանից հետաքրքրվեցին, թե եթե Սամվել Ալեքսանյանը հայտարարում է, որ ձեռնարկությունն իրեն չի պատկանում, ապա ինչո՞ւ էր ուղեկցում վարչապետին: «Կարեն Կարապետյանին ուղեկցում էր Սամվել Ալեքսանյանի աղջիկը, որը այդ կազմակերպության սեփականատերն է»,- ասաց Կարայանը:
Հարցին, թե որպես ոլորտը համակարգող նախարար, չե՞ք տեսնում հակասություն օրենքում, որ պատգամավորը նաեւ գործարարությամբ է զբաղվում, նախարարը պատասխանեց. «Իր աղջկա կազմակերպությունն է, ներկա է եղել»:
Սուրեն Կարայանը չպատասխանեց հարցին, թե հնարավո՞ր է առաջիկայում էլ այցելել «Քեթրին գրուպ» ընկերություն եւ այնտեղ «պատահաբար» տեսնեն ԱԺ պատգամավոր Միհրան Պողոսյանին, որին պատկանում է այդ ընկերությունը:
Նշենք, որ օրերս վարչապետ Կարեն Կարապետյանը աշխատանքային այց էր կատարել «Ալեքս գրուպ» տեքստիլ ձեռնարկություն, որտեղ նա քննարկել է տեքստիլի զարգացման հեռանկարը: Նրան ուղեկցում էր Սամվել Ալեքսանյանը, որի վերաբերյալ լուսանկար կար կառավարության կայքում, բայց ավելի ուշ Սամվել Ալեքսանյանի լուսանկարը հեռացվել էր կայքից: Թե ինչու էին կառավարության կայքից հեռացվել Ալեքսանյանի լուսանկարները չպարզաբանվեց:
Ի դեպ ավելի վաղ «Ալեքս գրուպ տեքստիլ» այցելել էր նաեւ Սերժ Սարգսյանը, ում ուղեկցում էր Տնտեսական զարգացումների եւ ներդրումների նախարար Սուրեն Կարայանը: