Հարձակումները սահմաններին, ինչպես նաեւ ԼՂ հակամարտության գոտում հրադադարի խախտումները բացառապես անընդունելի են։ Այս մասին հունիսի 22-ին լրագրողների հետ հանդիպման ժամանակ ասաց Հայաստանում Չեխիայի դեսպան Պետր Միկիսկան։
Նրա խոսքով՝ Չեխիան դեմ է զինված հակամարտությանը եւ սահմաններին ցանկացած հարձակումներին։ «Ղարաբաղյան հակամարտությամբ զբաղվում են ԵԱՀԿ Մինսկի խմբի համանախագահները, եւ դա միջազգային հանրության կողմից ընդունելի միակ ձեւաչափն է։ Ես ասում եմ, որ մեզ համար անընդունելի են սահմաններին կրակոցները, բայց դա չի նշանակում, որ մեզ համար ընդունելի են ղարաբաղյան հակամարտության գոտում հրադադարի ռեժիմի խախտումները։ Մենք մերժում ենք հրադադարի խախտումը նաեւ շփման գծում»,-ընդգծեց Միկիսկան։ Ըստ դիվանագետի՝ խնդիրը պետք է լուծվի միայն բանակցությունների միջոցով, եւ 21-րդ դարում հակամարտությունը պետք է լուծել խաղաղ ճանապարհով։
Հիշեցնենք, որ ղարաբաղյան հակամարտության գոտում գնդակոծությունների եւ սադրիչ գործողությունների հետեւանքով հունիսի 16-17-ին 4 հայ զինծառայող է զոհվել։