Վարդան Արաբյանը, «Դիսնեյ» ու Warner Brothers ստուդիաների նախկին խորհրդականը, մտադիր է Հայաստանում ստարտափ բացել։ Այս մասին – NEWS.am-ի թղթակցին հայտնել է Արաբյանը։
Վարդանի գործընկերը՝ Դեն Հիրշը, ավելի քան 20-ամյա փորձով մակրետինգի մասնագետ է։ Նրանք միասին մտադիր են Հայաստանում ձեռնարկություն բացել։
Գովազդում է, բայց չափը գիտի
DataOwl նախագծի գաղափարը բիզնեսից հաճախորդներին անհատական (անհատական նախեւառաջ բովանդակությամբ) sms հաղորդագրություններ առաքելու ծրագիրն է։ Հաղորդագրություններն իսկական հեռախոսահամարներից են ստացվում (ոչ քողարկված, ինչպես սովարական sms հաղորդագրությունների դեպքում)։ Նման հաղորդագրություններին ավելի հաճախ են պաասխանում։ Իսկ դրանք ուղարկվում են միայն նրանց, ովքեր համաձայն են ստանալ դրանք, նշում է Հիրշը։
«Բացի դրանից, համակարգը որոշում է՝ որտեղ եք դուք ու ինչ ժամ է հիմա ձեզ մոտ։ Դրա համար էլ ձեզ չեն ուղարկի ուշ երեկոյան լանչի մասին հիշեցում կամ էլ Նյու Յորքում համակարգչային խանութի մասին հաղորդագրություն, եթե դուք Լոս Անջելեսում եք»։
DataOwl-ը հավաքում է տվյալներ ընկերություններից, ընդհանրացնում դրանք ու կիրառում ալգորիթմեր՝ անհատական հաղորդագրությունների մասին։ Բայց մի ընկերության անձնական տվյալները մյուսներին չեն փոխանցվում։ Այլ կերպ ասած՝ ռեստորան «Ա»-ն չի կարող իմանալ «Բ» ռեստորանում պատվերի միջին գումարը կամ էլ այնտեղ հաճախորդների մնալու միջին ժամանակը։
Տեքստային հաղորդագրություններին, նշում են հեղինակները, 10 անգամ հաճախ են պատասխանում, քան էլեկտրոնային նամակներին։ Հաճախորդների 80 տոկոսը նախընտրում է ծանուցագրեր ստանալ sms-ով, նշում են DataOwl-ի հիմնադիրները։
«Իհարկե sms-ները վճարովի են, բայց դրանց հաճախ են պատասխանում։ Օրինակ դուք 20 դոլարով 1000 հաղորդագրություն եք ուղարկում։ Բայց այդ հազար հաճախորդներից 100-ը մեկ ժամվա ընթացքում իրականացնում են միջինը 40 դոլարի գործարք, այնպես որ ծախսն իրեն արդարացնումէ»,- նշում է Հիրշը ։
Վարդանն ու Դենը ծանոթացել են երբ աշխատում էին ախտորոշումների մշակման ժամանակի կրճատման նախագծի վրա։ Պարզվել է, որ Վարդանը, որը ինքնուս ծրագրավորող է ու Դենը, որը փորձառու մասնագետ է ( որն աշխատել է AOL-ի ու Time Warner-ի համար) անսպասելիորեն շատ ընդհանրություններ ունեին։ «Ինձ համար նա հիմա ասես ընտանիքի անդամ լինի»,- խոստովանում է Վարդանը։
Ինքնուս մասնագետը
Երբ Վարդանն ավարտել է 9-րդ դասարանը՝ գնացել է հանձնելու մաթեմատիկայի բուհական քննություն։ «Չգիտեմ ինչպես, բայց ես հայտնվեցի ամբողջ Քալիֆորնիայի լավագույն 5 տոկոսի մեջ։ 16 տարեկանում ես սկսեցի աշխատել համակարգիչների ու ցանցերի հետ ու հայտնվեցի հեռահաղորդակցության ընկերությունում։ Նրանց ֆայլի փոխանակիչները փչացել էին։ Ես դրանք 2 օրում սարքեցի։ Իմ կողքով նրանց ֆինանսական մենեջերն անցավ ու ասաց «Իսկ դու կաշխատեի՞ր մեզ մոտ»։
Դրանից հետո նա դարձել է համակարգային ադմինիստրատոր ու սկսել է ծրագրավորում սովորել։ Այդ ժամանակ նա նաեւ սկսել է աշխատել հեռահաղորդակցության համար սոֆթի բարելավման վրա։
Այստեղից էլ սկսվել է մի քանի ընկերություններում ՏՏ խորհրդականի նրա աշխատանքը։ Աշխատելով այդտեղ՝ նա մասնակցել է այնպիսի ընկերությունների նախագծերում, ինչպիսիք են Ուոլթ Դիսնեյի ստուդիան, որտեղ նա օգնում էր գործարկել Blu Ray 2, GDMX (Warner Brothers ստուդիա) ու Sony-ն, որտեղ նա օգնում էր ներդնել Java թուլքիթերը։ « Բացի դրանից ես օգնում էի վերլուծել տվյալները The Apprentice հեռուստաշոուի համար, որը Դոնալդ Թրամփն էր վարում»,- հավելել է Վարդանը
«Ես սիրում եմ Ամերիկան։ Ինձ համար դա հրաշալի վայր է։ Բայց ես սիրում եմ իմ ժողովրդին։ Այստեղ այնքան շատ տաղանդներ կան, որոնք չեն կարողանում գտնել իրենց տեղը։ Դրա համար էլ ես ուրախ եմ , որ մենք այստեղ ձեռնարկություն կբացենք։ Մենք կկարողանանք գրավել այդ երիտասարդներից շատերին։ Հիշում եմ, ինչպես էի ես ուրախանում, երբ գրեցի իմ առաջին կոդն ու երբ այն աշխատեց։ Հիմա նրանց հերթն է՝ թող նրանք էլ նույն ձեւով ուրախանան»,- ասում է Վարդանը։