«Զինված խմբի» գործով ամբաստանյալ, պաշտպանության նախկին փոխնախարար Վահան Շիրխանյանին նիստերի դահլիճից հեռացնելուց հետո հեռացավ նաեւ նրա պաշտպան Հայկ Ալումյանը:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում դատավոր Արմեն Բեկթաշյանն այսօր՝ հունիսի 23-ին, դահլիճ վերադառնալուց հետո հայտարարեց, որ Հայկ Ալումյանն անհարգալից վերաբերմունք է դրսեւորել դատարանի հանդեպ: Մեղադրողը միջնորդեց դատական սանկցիա կիրառել Հայկ Ալումյանի հանդեպ եւ պատասխանատվության ենթարկելու համար դիմել Փաստաբանների պալատին:
Դատավոր Բեկթաշյանը մինչդեռ որոշում կայացրեց հանրային պաշտպան ներգրավվել գործում: Ամբաստանյալների պաշտպանները հակադարձեցին՝ նման իրավունք դատարանը չունի, քանի որ Շիրխանյանն իր պաշտպանից չի հրաժարվել, հետեւաբար հանրային պաշտպան ներգրավվելու հիմքեր չկան: Պաշտպանների պնդմամբ, Վահան Շիրխանյանն է ցանկություն հայտնել, որ իր հեռանալուց հետո Ալումյանը նույնպես չմասնակցի նիստին:
Նշենք, որ Վահան Շիրխանյանը 3 ժամով նիստերի դահլիճից հեռացվեց, որովհետեւ ըստ դատավորի, նա հրաժարվել է կանգնել եւ անհարգալից վերաբերմունք է դրսեւորել դատարանի նկատմամբ:
Արմեն Բեկթաշյանը որոշում կայացրեց դիմել Փաստաբանների պալատ՝ պատասխանատվության ենթարկելու Հայկ Ալումյանին:
Դատական նիստը հետաձգվեց:
Նշենք, որ Վահան Շիրխանյանն այսօր դատարան էր տեղափոխվել աթոռով: Հիշեցնենք, որ նախորդ նիստերին նա գալիս էր անվասայլակով: Ըստ պաշտպանի՝ նա առողջական լուրջ խնդիրներ ունի, իսկ պատկան մարմինները դա հաշվի չեն առնում:
Ըստ մեղադրական եզրակացության՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել: Այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:
Հայր Անտոն Դիկրան Թոթոնջյանն էլ 2015թ. ապրիլից անձնապես ծանոթացել է Իսպանիայից ժամանած Արթուր Վարդանյանի հետ, մասնակցել է վերջինիս կողմից ստեղծված ու ղեկավարած հանցավոր համագործակցությանը` ֆինանսավորելով այն:
Պաշտպանության նախկին փոխնախարար Վահան Շիրխանյանը, Գառնիկ Մարգարյանը, Վլադիմիր Առաքելյանը, Խաչիկ Ավետիսյանը, Ավետիս Բարեյանը, Վաղինակ Ստեփանյանը, Արթուր Եղիազարյանը, Վահագն Սալնազարյանը, Արման Հայրապետյանը, Էդվարդ Ներսիսյանը, Հարություն Սարիբեկյանը, Արա Պողոսյանը, Տիգրան Բոյաջյանը, Գեւորգ Ջնդոյանը, Արկադի Մարդոյանը, Ասյա Մկրտչյանը, Մարինե Կաթանյանը, Նելլի Մինասյանը նույնպես միացել են Արթուր Վարդանյանին:
Նրանց բոլորին մեղադրանք է առաջադրվել Քրեական օրենսգրքի 223-րդ հոդվածի (Հանցավոր համագործակցություն ստեղծելը կամ հանցավոր համագործակցությանը մասնակցելը), 235-րդ հոդվածի 3-րդ (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, կատարվել են կազմակերպված խմբի կողմից) եւ 35-300-րդ հոդվածի 1-ին մասով (Իշխանությունը յուրացնելու նախապատրաստություն): Նշենք, որ դատարան է ուղարկվել այն անձանց գործը, որոնց մեղադրանքը հետագայում խստացվել էր: