Հայաստանը պատրաստակամ է խորացնելու հարաբերությունները Լիտվայի հետ՝ փոխադարձ հետաքրքրություն ներկայացնող ոլորտներում: Այս մասին, այսօր՝ հունիսի 23-ին, Հայաստանի Հանրապետությունում Լիտվայի Հանրապետության արտակարգ եւ լիազոր դեսպան Էրիկաս Պետրիկասի հետ հանդիպման ժամանակ նշել է ՀՀ վարչապետ Կարեն Կարապետյանը:
Կառավարությունից NEWS.am-ին հայտնում են, որ վարչապետը նշել է, որ երկու երկրների միջեւ ձեւավորվել են ամուր բարեկամական կապեր, եւ Հայաստանը պատրաստակամ է խորացնելու հարաբերությունները փոխադարձ հետաքրքրություն ներկայացնող ոլորտներում:
Վարչապետն ու Լիտվայի դեսպանը քննարկել են հայ-լիտվական տնտեսական համագործակցության հետագա զարգացմանը վերաբերող հարցեր: Կողմերը համակարծիք են եղել, որ առկա է չօգտագործված մեծ ներուժ, եւ պետք է գործնական քայլեր ձեռնարկել այն իրացնելու ուղղությամբ: Առեւտրատնտեսական կապերի աշխուժացման համատեքստում կարեւորվել է հայ-լիտվական միջկառավարական հանձնաժողովի ակտիվ աշխատանքը, որի երկրորդ նիստը նախատեսվում է անցկացնել այս տարվա աշնանը, Երեւանում: Զրուցակիցներն անդրադարձել են համատեղ գործարար համաժողովների կազմակերպման, երկկողմ ու բազմակողմ ձեւաչափերով գործակցության ընդլայնման եւ ծրագրերի իրականացման հնարավորություններին:
Կարեն Կարապետյանը եւ Էրիկաս Պետրիկասը մտքեր են փոխանակել նաեւ Հայաստան-Եվրոպական միություն հարաբերությունների եւ ԵՄ շրջանակում Հայաստան-Լիտվա համագործակցության շուրջ:
