Անհրաժեշտ է գյուղատնտեսության ապահովագրման համակարգ ներդնել: Այս մասին այսօր՝ հունիսի 23-ին կարկտահարության վնասների վերաբերյալ քննարկման ժամական նշել է ԱԺ «Ելք» խմբակցության պատգամավոր Լենա Նազարյանը՝ հավելելով, որ ըստ այդ ծրագրի՝ դիզվառելիքի եւ պարարտանյութերի համար գումար շռայլելու փոխարեն պետությունը պետք է ստեղծի ապահովագրական ֆոնդ, որտեղ կներդրվեն սուբսիդիաների գումարները, եւ հնարավոր կլինի ապահովագրել բերքի գոնե 50 տոկոսը:
«Այս համակարգի մասին կառավարությունը խոսում է դեռեւս 2010 թ.-ից, սակայն իրագործումը հետաձգվում է: Երեկ ԱԺ-ում հաստատվեց կառավարության նոր ծրագիրը, որը նախատեսում է գյուղատնտեսության ապահովման փորձնական համակարգ ներդնել հաջորդ տարիներն: Անընդհատ գտնվում ենք նախապատրաստական եւ փորձնական փուլերում, համակարգը չի ներդրվում, միչդեռ սա է իրական լուծումը եւ աջակցությունը»,-ասաց բանախոսը՝ ընդգծելով, որ հակակարկտային ենթակառուցվածքների եւ այս ծրագրի համատեղ կիրառությամբ կարելի է հարցին համակարգային լուծում տալ:
Լենա Նազարյանի հացադրումներին եւ առաջարկներին ի պատասխան՝ գյուղատնտեսության փոխնախարար Աշոտ Հարությունյանն ասաց, որ գյուղատնտեսության մեջ միանգամից 100 տոկոսանոց ապահովագրման համակարգի ներդրումը դժվար է, այն կաշխատի միայն վնասների հնարավոր ռիսկերը նվազեցնելու դեպքում: Նրա խոսքով, նախեւառաջ պետք է ապահովել պետական ներդրումները այգիների, հացահատիկային բույսերի մշակման գործում:
Անդրադառնալով դիզվառելիքի եւ պարարտանյութերի համար գումար «շռայլելու» հարցադրմանը՝ փոխնախարարը Նազարյանին պատասխանեց. «Որ ասում ենք՝ շռայլորեն սուբսիդավորում, դա ինքնանպատակ չէ, հնարավորության սահմաններում պետությունը բյուջեով հատկացնում է գումար՝ ազոտական պարարտանյութերի, կալիումական պարարտանյութերի, դիզելային վառելանյութի, նաեւ սերմացուների համար»: Փոխնախարարը նաեւ հավելեց, որ 2018 թվականից պարարտանյութերը սուբսիդավորելու մտադրություն չունեն: