Հայաստանի ներքին շուկան փոքր է, այս պատճառով տնտեսական զարգացման հիմքում պետք է դրվեն արտադրական այնպիսի հնարավորություններ, որոնք կարող են արտահանման մրցունակություն ապահովել: Այս մասին հունիսի 23-ին` լրագրողների հետ հանդիպման ժամանակ ասաց Հայաստանի նախկին վարչապետ, հանրապետական պատգամավոր Խոսրով Հարությունյանը:

Պատգամավորի խոսքով` տնտեսության զարգացման կարեւորագույն խնդիրն այն է, թե ինչ կերպ են Հայաստանի վրա գրավելու ներդրողների ուշադրությունը:

«2017-2022 թվականների համար մեր խնդիրը պետք է լինի այնպիսի համակարգերի ստեղծումը, որոնք ապագայում, 2022 թվականից հետո լուրջ նախադրյալներ կստեղծեն երկպատիկ տնտեսական աճի համար: Սա հիմնականում բարեփոխումների ծրագիրն է»,- պարզաբանեց նա:

Ինչ վերաբերում է կառավարության ծրագրով գրանցված ցուցանիշներին, մասնավորապես` ամեն տարի 5 տոկոս տնտեսական աճ ապահովելուն, առաջիկա 5 տարիներին 25 տոկոսով նվազագույն աշխատավարձի աճին, 12 տոկոսով գործազրկության կրճատմանը, ինչպես նաեւ ՀՆԱ-ում արտահանվող արտադրանքի եւ ծառայությունների բաժնի մեծացմանը եւ դա մինչեւ 40-45 տոկոս մակարդակի հասցնելուն, Հարությունյանը նշեց, որ հավակնոտ թիրախներին հասնելու համար նույնիսկ տնտեսական 15 տոկոսով աճը բավարար չէ:

«Սակայն կառավարությունը շատ լավ հասկանում է, որ այս 5 տարիներին տնտեսական հիմնական աղբյուրը պետք է լինեն ներքին պաշարները: Այսպիսով` 5 տոկոս աճ ապահովելով, միաժամանակ անցկացնելով նոր ինստիտուցիոնալ բարեփոխումներ, ապագայում ավելի արագ զարգացում նախապատրաստել»,- ասաց պատգամավորը` հավելելով, որ 5 տոկոս աճը կհանգեցնի աղքատության կրճատմանը եւ նվազագույն աշխատավարձի բարձրացմանը:

Խոսելով արչտահանման ծավալների ավելացման մասին` նախկին վարչապետը նշեց,որ սա բավականին բարդ խնդիր է,որի լուծման համար անհրաժեշտ է հասանելիություն ապահովել նոր շուկաներին: