Ադրբեջանի իշխանությունները չեն ցանկանում հաշվի առնել ԵԱՀԿ Մինսկի խմբի դիրքորոշումը: Այս մասին հունիսի 23-ին` լրագրողների հետ հանդիպման ժամանակ ասաց նախկին վարչապետ, հանրապետական պատգամավոր Խոսրով Հարությունյանը:
Նրա խոսքով` Ադրբեջանի դիրքորոշումը սկսել է փոխվել Ալիեւ կրտսերի իշխանության գալով, որը հարբել է նավթադոլարներով:
«Ըստ որում` նրան այս հարցում, ցավոք, օգնել են ե’ւ Բելառուսը, ե’ւ Ռուսաստանը: Սա փաստ է: Մեր ռազմավարական գործընկերը Ադրբեջանին զենք է վաճառել` վստահ լինելով, որ այդ զենքը վաղ թե ուշ մեր դեմ է օգտագործվելու»,- նշեց նախկին վարչապետը` հավելելով, որ դրա հետ մեկտեղ Ռուսաստանը զենք է մատակարարել նաեւ Հայաստանին` կողմերի միջեւ ուժերի հավասարակշռությունն ապահովելու նպատակով:
Հարությունյանի կարծքով` Ադրբեջանի դիրքորոշումը հանգում է հակամարտությունը բացահայտ ուժային ճանապարհով լուծելուն: «Հիմա նրանք նույնիսկ հաշվի չեն առնում ԵԱՀԿ Մինսկի խմբի դիրքորոշումը»,- ընդգծեց Խոսրով Հարությունյանը:
Պատգամավորի կարծիքով` Հայաստանի գործող իշխանությունների ամենագլխավոր հաջողությունն այն է, որ նրանք, չնայած այսքան անբարենպաստ պայմաններին եւ ֆինանսական միջոցների սղությանը, կարողացել են Ադրբեջանի հետ ուժերի հարաբերական հավասարակշռություն ապահովել: