ԵՏՀ խորհուրդը փոփոխություններ է արել միասնական մաքսային սակագնում՝ 472 դիրքերի վերաբերյալ։ Այսպիսով հաշվի են առնվել Ռուսաստանի այն պարտավորությունները, որոնք նա ստանձնել է ԱՀԿ-ին անդամակցելիս, գրում է ԵՏՀ մամուլի ծառայությունը։
Ավելի վաղ՝ 2017-ի մայիսին ԵՏՀ Կոլեգիայի որոշումով ճշգրտվել էին ներմուծման մաքսային տուրքերի դրույքները՝ 491 դիրքերի նկատմամբ։
Այսօր ԵՏՀ Խորհուրդը քննարկել է զգայուն համարվող ապրանքների մաքսատուրքերի չափը։ Այդ ապրանքներից են համարվում փոխադրամիջոցների համար զանազան սարքավորումները, անօդաչու թռչող սարքերը, ավիացիոն տեխնիկայի որոշ տեսակներ, թեթեւ արդյունաբերության այլ արտադրանքներ, ձուկն ու ծովամթերքը, մի շարք այլ ապրանքներ։
Մասնավորապես նվազել են մաքսատուրքերը ձկան որոշ տեսակների, ձկնկիթի ու լյարդի, լուցկու, հագուստի, վարդերի, սեղանի ու խոհանոցային սպասքի, նաեւ սառնարանների համար։ Կնվազեն նաեւ խնձորի, տանձի, սերկեւիլի, խմորիչի, դռների, պատուհանների, զանազան կտորների ու միկրոալիքային վառարանների մաքսատուրքները։
