Դեռեւս անցած տարվա դեկտեմբերին Գեղարքունիքի մարզի դատարան ուղարկված՝ Վարդենիսի քաղաքապետի նկատմամբ բնակիչներից մեկի կողմից բռնություն գործադրելու գործով նիստերն արդեն 3-4 ամիս է՝ չեն կայանում:
Նիստերը հետաձգվում են տարբեր պատճառաբանություններով: Վերջերս էլ գործով դատախազը թոշակի է անցել, նոր դատախազ է ներգրավվել գործում, որն էլ ժամանակ է խնդրել նյութերին ծանոթանալու համար:
NEWS.am-ի հետ զրույցում ամբաստանյալ Իվան Տկաչենկոյի պաշտպան Տիգրան Աբրահամյանը նշեց, որ հույս ունեն՝ վերջապես հնարավորություն կունենան դատարանում հարցաքննելու տուժողին՝ քաղաքապետ Վոլոդյա Խլոյանին:
«Ամեն անգամ տարբեր պատճառաբանություններով քաղաքապետը դատարան չի գալիս, հենց նիստերի օրերին գրություն է ուղարկում, որ հույժ կարեւոր գործեր ունի»,- ասաց փաստաբանը:
Նշենք, որ ամբաստանյալն իրեն առաջադրված մեղադրանքը չի ընդունում: Ըստ նրա փաստաբան Տիգրան Աբրահամյանի՝ քաղաքապետարանի աշխատակիցները ծաղրել են նրան, ինչից հետո բարկացել է, մտել քաղաքապետի մոտ, սակայն որեւէ բռնություն չի գործադրել, նույնիսկ վիճաբանություն չի եղել:
Ըստ մեղադրական եզրակացության` Տկաչենկոն 2016թ. հոկտեմբերի 26-ին Վարդենիսի քաղաքապետի աշխատասենյակում վիճաբանության մեջ է մտել իշխանության ներկայացուցիչ Վոլոդյա Խլոյանի հետ եւ բռնություն գործադրել վերջինիս նկատմամբ: Նրան մեղադրանք է առաջադրվել Քրեական օրենսգրքի 316-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին: