Հայաստանի ԱԻՆ-ում, հունիսի 25-ին, ժամը 20:26-ին տեղեկություն է ստացվել, որ Կոտայքի մարզի Գառնու ձորում տեղի է ունեցել ավտովթար, ավտոմեքենան ընկել է ձորը, կան տուժածներ. անհրաժեշտ է փրկարարների օգնությունը:

Դեպքի վայր են մեկնել հատուկ նշանակության փրկարարական աշխատանքներ իրականացնող կենտրոնի երկու փրկարարական ջոկատ:

Պարզվել է, որ «Մուշեղի ձոր» կոչվող հանգստյան գոտու մոտակայքում «Opel Astra G» մակնիշի 25 XX 522 համարանիշի ավտոմեքենան դուրս է եկել ճանապարհի երթեւեկելի հատվածից եւ գլորվել հարակից ձորը (մոտ 600 մ):

Մինչ փրկարարների՝ կանչի վայր հասնելը 21-ամյա  Ն. Հ.-ն հոսպիտալացվել է «Սուրբ Գրիգոր Լուսավորիչ» ԲԿ։

Փրկարարներն ավտոմեքենայից մոտ 200 մ հեռավորությունից 22-ամյա Լեւոն Հ.-ին եւ 32-ամյա Ռոման Հ.-ինն մոտեցրել (300 մ) են շտապօգնության ավտոմեքենաներին, որոնք հոսպիտալացվել են «Սուրբ Գրիգոր Լուսավորիչ» ԲԿ: Բժիշկները տուժածների առողջական վիճակը գնահատել են միջին ծանրության:

Փրկարարները 30-ամյա Արշակ Կ.-ի եւ 19-ամյա  Գեւորգ Մ.-ի դիերը մոտեցրել (մոտ 270 մ) են շտապօգնության ավտոմեքենաներին:

Shamshyan.com-ի փոխանցմամբ, մահացածներն ու վիրավորները հարևաններ էին, բնակվում էին Ջրվեժ թաղամասում և եկել էին ամառային հանգիստն անցկացնելու:

Ձեռնարկվում են նաև գործողություններ մետաղի ջարդոնի վերածված ավտոմեքենան անդունդից դուրս բերելու ուղղությամբ: