Հայաստանի հանրապետական կուսակցությունը միշտ էլ ողջունել է կուսակցությունների կոնսոլիդացիան, որը հիմնված է գաղափարի վրա: Այս մասին այսօր՝ հունիսի 26-ին, NEWS.am-ի հետ զրույցում ասաց ՀՀ ԱԺ փոխնախագահ Էդուարդ Շարմազանովը ՝ անդրադառնալով «Ժառանգության» ղեկավար Րաֆֆի Հովհաննիսյանի այն հայտարարությանը, որ պետք է քաղաքական ուժերը համախմբվեն եւ պայքարեն իշխանության դեմ:
«Մենք քաղաքական ուժերի բեւեռացման խնդիր ունենք, բնական ընտրության մեջ կուսակցությունները կամ հեռանում են, կամ հայտվում են լուսանցքում, կամ պետք է միավորվեն ուժեղ ընդդիմադիր կուսակցությունների հետ: Ավելի ուժեղ ընդդիմադիրները խորհրդարանում են, ոչ թե դրանից դուրս: Եթե կորոշեն միանալ «Ելքին», կամ «Ծառուկյան» դաշինքին, այդ կուսակցության խնդիրն է»,-ասաց նա:
Անդրադառնալով Րաֆֆի Հովհաննիսյանի այն հայտարարությանը, որ 2018թ. հնարավոր է թավշյա հեղափոխություն լինի, եթե Սերժ Սարգսյանը շարունակի մնալ իշխանության մեջ, Շարմազանովն ասաց. «Հարգանք ունենալով Րաֆֆի Հովհաննիսյանի նկատմամբ, պետք է նշեմ, որ քաղաքականության մեջ հովհարային անջատումներով կուսակցություններին եւ քաղաքական գործիչներին չափից դուրս լուրջ մի վերաբերվեք: Ինչ վերաբերում է թավշյա հեղափոխություններին, ապա Հայաստանի պատմությունն ունեցել է բազում օրինակներ, երբ նշանակել են իշխանափոխության օր, ժամ, տեղ, բայց Հայաստանում ընտրությունները տեղի են ունեցել 2017թ. ապրիլին եւ ՕՐՕ-ն ստացել է այն, ինչ ստացել է: Յուրաքանչյուր քաղաքական գործիչ պետք է սերտի Խորենացու Հայոց պատմությունը, կամ գոնե առաջին նախագահ Լեւոն Տեր-Պետրոսյանի այն խոսքերը, որ յուրաքանչյուրը պետք է իր վերմակի չափով ոտքերը մեկնի: Այսինքն՝ յուրաքանչյուր քաղաքական գործիչ պետք է խոսի այն չափով, որքան վստահություն է ստացել ընտրություններին»:
Նրա խոսքով, ընտրությունների միջոցով ժողովուրդը յուրաքանչյուր կուսակցության ցույց տվեց իր տեղը. «Այնպես որ մի գերագնահատեք Րաֆֆի Հովհաննիսյանի խոսքերի լրջությունը: Տեսեք թե ինչ ընթացք ստացավ Րաֆֆի Հովհաննիսյանի գլխավորած ուժը, երբ 2007թ. խորհրդարան եկավ, ովքեր էին կողքը, իսկ հիմա մնացել է միայն Արմեն Մարտիրոսյանը»:
Ինչ վերաբերում Սեյրան Օհանյանի այն հայտարարությանը, որ իշխանությունը պետք է հաշվետու լինի ժողովրդին, հակառակ դեպքում ժողովուրդը պետք է դուրս գա եւ պահանջի, որ նրանք հաշվետու լինեն, կամ ստիպի հեռանալ, Շարմազանովն ասաց. «Այո, յուրաքանչյուր իշխանություն պետք է հաշվետու լինի ժողովրդին, իսկ հաշվետու լինելու լավագույն ճանապարհն ընտրություններն են»:
