Ժամանակը ցույց կտա՝ որքանով էի ես իրավացի կամ ոչ: Այս մասին, այսօր՝ հունիսի 26-ին, NEWS.am-ի հետ զրույցում նշել է ԱԺ «Ելք» խմբակցության քարտուղար Գեւորգ Գորգիսյանը՝ անդրադառնալով իր ավելի վաղ արած հայտարարությանը, թե «Ժառանգություն» կուսակցության առաջնորդ Րաֆֆի Հովհաննիսյանը քաղաքական դիակ է:
Ինչ վերաբերում է նախօրեին Րաֆֆի Հովհաննիսյանի կոշտ արձագանքին, որ նման հայտարարություն անողը անդաստիարակ է եւ ողնաշար չունի, որ ներողություն խնդրի իր խոսքերի համար, Գորգիսյանը չցանկացավ մեկնաբանել. «Որեւէ կերպ չէի ցանկանա արձագանքել Րաֆֆի Հովհաննիսյանի հայտարարությանը, իր իրավունքն է»,-ասաց Գորգիսյանը:
Հարցին, թե հետեւություն անելո՞ւ է «Ժառանգության» առաջնորդի խոսքերին, նա կտրուկ պատասխանեց. «Բացարձակ»:
Անդրադառնալով Րաֆֆի Հովհաննիսյանի՝ քաղաքական ուժերի մեկ թիմում համախմբվելու կոչին, «Ելք»-ի ներկայացուցիչն ասաց. «Ժառանգության» համագումարը ցույց տվեց, որ այդ մարդիկ ասելիք չունեն, թե ինչ նպատակի շուրջ են ուզում համախմբվել: Իշխանության դեմ պայքարելը բավարար նպատակ չէ միավորվելու համար: Ինչ-որ բանի դեմ պայքարելը գաղափար չէ: Ելքի ձեւավորման հիմքը գաղափարական է, թե ինչ մոտեցումներով ենք գնում իշխանափոխության: Հենց այդ գաղափարական հենքն է երաշխավորում դաշինքի ամրությունը»:
Ավելի վաղ NEWS.am-ը հայտնել էր, որ հունիսի 25-ին «Ժառանգություն» կուսակցության 11-րդ համագումարում կուսակցության առաջնորդ Րագֆֆի Հովհաննիսյանը, մասնավորապես, ասել էր. «Գռեհիկ հայհոյողներ կան նաեւ ընդդիմադիր դաշտում։ Քանի որ ընդդիմադիր մեր գործընկերները չեն ունեցել այդ խիղճը, ողնաշարը, տղամարդկությունը ներողություն խնդրելու, ես ազգային հերոսի առջեւ ներողություն եմ խնդրում, որ տակավին ունենք երիտասարդ սերնդի անդաստիարակ անդամներ, որոնք խոսում են քաղաքական դիակների մասին։ Ամեն մեկս կգնա Աստծո կամոք դիակ կդառնա, բայց ես ամաչում եմ, որ այս որակն է նաեւ ընդդիմադիր դաշտում»:
Հիշեցնենք, որ դեռեւս այս տարվա մայիսի Րաֆֆի Հովհաննիսյանին «Ելք» խմբակցության պատգամավոր Գեւորգ Գորգիսյանն էր անվանել «քաղաքական դիակ»։ «Ելք» խմբակցության պատգամավոր Էդմոն Մարուքյանն էլ նշել էր, որ Գորգիսյանը կոշտ է արտահայտվել, որ ինքը նման կերպ չէր արտահայտվի: