Երեւանի ավագանու «Երկիր Ծիրանի» խմբակցության արդեն նախկին անդամներ Հայկ Պետրոսյանը եւ Մնացական Պարակշիեւը Երեւանի ավագանիում անկախ գործելու հնարավորություն չունեն, կամ պետք է մտնեն ՀՀԿ խմբակցություն, կամ «Ելք». դրանից էլ պարզ կլինի, թե նրանք ինչ միտում են ունեցել: Այս մասին այսօր՝ հունիսի 26-ին, լրագրողների հետ հանդիպման ժամանակ հայտարարել է Երեւանի ավագանու «Երկիր Ծիրանի» կուսակցության փոխնախագահ Կարո Աղաջանյանը՝ հավելելով, որ օրենսդրությունն է պահանջում լինել որեւէ խմբակցությունում:
«Եթե «Երկիր Ծիրանի» կուսակցությունը առաջարկում է, որ նրանք վայր դնեն իրենց մանդատները, որ գան այն անդամները, որոնք պատրաստակամ են խոսելու, իսկ նրանք հրաժարվում են «Երկիր Ծիրանիի» անդամ լինելուց եւ պահպանում են մանդատները՝ հայտարարելով, որ պատրաստ են համագործակցել իշխանությունների հետ, ես այդտեղ էլ կարող եմ հիմնավոր կասկած ունենալ , որ մանդատների վայր չդնելը նույնպես համագործակցության արդյունք են»,- ասաց Աղաջանյանը:
Նա մանրամասնեց, թե կուսակցության որ սկզբունքն են դավաճանել նախկին անդամները. պարզվում է՝ մինչեւ Երեւանի ավագանու նիստը կուսակցությունում ժողով են հրավիրել եւ որոշել, որ այդ օրվա օրակարգի վերաբերյալ յուրաքանչյուրը ելույթ է ունենալու հարց է տալու՝ օգտվելով օրենքի պահանջից, սակայն նրանցից մեկը բացարձակ լռել է, իսկ մյուսը երկու հարց է հնչեցրել, որը չի վերաբերել օրակարգի տվյալ հարցին:
Լրագրողի հարցին՝ ներդրվա՞ծ են եղել Հայկ Պետրոսյանը եւ Մնացական Պարակշիեւը, Աղաջանյանն ասել է՝ իրավունք չունի այդպիսի մեղադրանք հնչեցնել քանի դեռ փաստեր չունի: