Երեւանի ավագանու «Երկիր Ծիրանի» խմբակցությունը լքած Մնացական Պարակշիեւը եւ Հայկ Պետրոսյանը ավագանիում մանդատ են ստացել կուսակցության ղեկավար Զարուհի Փոստանջյանի շնորհիվ։ Այս մասին այսօր՝ հունիսի 26–ին, լրագրողների հետ զրույցում հայտարարել է «Երկիր Ծիրանի» խմբակցության անդամ Սոնա Աղեկյանը։
Նշենք, որ երբ վերջիններիս կուսակցությունը անվստահություն հայտնեց, նրանք հեռացան խմբակցությունից եւ հայտարարեցին, որ ունեն ընդամենը գործելաոճի տարբերություն։ Զարուհի Փոստանջյանն ավելի շատ էմոցիոնալ հայտարարությունների կողմնակից է, իսկ իրենք բովանդակային, հավասարակշռված քննարկումների։
«Ոճի մասին կարող է խոսել նա, ով ունի քաղաքական կենսագրություն եւ երբեւէ օգտագործել է այդ հարթակը, որ հասկանան, թե ինչ ոճով է լուծելու այն խնդիրները, ինչի համար լիազորված է։ Լինելով Երեւանի ավագանու անդամ՝ նրանք ունեին հարթակ, որը տրվել էր նրանց, ոչ թե Հայկ Պետրոսյանի եւ Մնացական Պարակշիեւի ջանքերով կամ քաղաքական կենսագրության շնորհիվ։ Նրանք այդ կարգավիճակը ձեռք են բերել Զարուհի Փոստանջյանի ունեցած ավանդի եւ «Երկիր Ծիրանի» կուսակցության շնորհիվ։ Նրանք նախկինում, ինչպես բոլոր անդամներս, քաղաքականության մեջ չեն եղել, եւ մեզ որեւէ մեկը չի ճանաչում, մենք «Երկիր Ծիրանիի» եւ Զարուհի Փոստանջյանի շնորհիվ ձեռք ենք բերել կարգավիճակ, որը լիազորություն է՝ բարձրաձայնելու երեւանցուն հուզող խնդիրները»,-ասաց Աղեկյանը:՝ հավելելով, որ նրանք դրժել են կուսակցության ժողովի եւ Զարուհի Փոստանջյանի առջեւ տված երդումը։
«Հունիսի 16–ից առաջ ավագանու բոլոր անդամներով Զարուհի Փոստանջյանի եւ մեր կուսակցության ժողովի առջեւ երդում ենք տվել եւ պարտավորություն ստանձնել, որ մեզ տրված լիազորությունը, ոչ թե մանդատը, օգտագործելու ենք ի շահ ի նպաստ երեւանցու։ Նրանք դրժել են դա։ Անձամբ ծանոթացել ենք Երեւանի ավագանու կանոնակարգին, բոլորով կարդացել ենք քննարկել ու ծանոթացել մեր իրավունքները, որ օրակարգին վերաբերող բոլոր թեմաների շուրջ ելույթ ունենա 5 րոպե, հարցեր տա հարակից զեկուցողին 2 րոպե եւ այլն, յուրաքանչյուրս ունեինք 35 րոպե ելույթի եւ հարցերի իրավունք, նրանք չեն իրացրել իրենց իրավունքը»,–ասել է Սոնա Աղեկյանը։
