ԵԽԽՎ նախագահ Պեդրո Ագրամունտն այսօր՝ հունիսի 26-ին, հայտարարել է, որ հրաժարական չի ներկայացնելու: Այս մասին NEWS.am-ին ասաց ԵԽԽՎ-ում հայկական պատվիրակության ղեկավար, ԵԽԽՎ փոխնախագահ Արփինե Հովհաննիսյանը:
«Ագրամունտի այս հայտարարությունը միանգամայն բնական եմ համարում իր մոտեցումների եւ բարոյական կերպարի շրջանակում, որովհետեւ ինքը դեռ նախորդ նստաշրջանից ցույց տվեց, որ չի պատրաստվում իր նկատմամբ վստահության բացակայության պայմաններում հեռանալ բարոյական ընթացակարգի շրջանակում, եւ քանի որ չկար իրավական ընթացակարգ, ինքը հասավ մինչեւ այս նստաշրջան, սակայն այսօր ԵԺԿ խումբը եւս անվստահություն հայտնեց: Այս պահին, նա, անվստահությունը նկատի ունենալով, կարող է հրաժարական տալ, բայց չեմ կարծում, որ նա այդպես կվարվի: Եթե վաղը զեկույցից հետո մենք իրավական հիմք ստեղծենք, սկզբունքորեն կստեղծվի նրա հրաժարականի կամ անվստահություն հայտնելու իրավական ընթացակարգը»,- ասաց Արփինե Հովհաննիսյանը:
Հայկական պատվիրակության ղեկավարի խոսքով՝ վաղը սպասվելիք զեկույցով փոփոխություններ են նախատեսվում ԵԽԽՎ կանոնակարգում՝ հնարավորություն տալով հետ կանչել կամ անվստահություն հայտնել ԵԽԽՎ բարձրաստիճան ընտրովի պաշտոնյաներին, այդ թվում ԵԽԽՎ նախագահին. «Եթե վաղն այդ զեկույցն ընդունվի, հնարավորություն կստեղծվի Ագրամունտին եւս հետ կանչել»:
