Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր` հունիսի 26-ին, Ավան եւ Նոր Նորք վարչական շրջանների ընդհանուր իրավասության դատարանում հարցաքննվեց վկա կուրսանտ Արտավազդ Միրզոյանը: Հայկազ Բարսեղյանին կախված վիճակում հենց Արտավազդն է առաջինը հայտնաբերել, նա պատմեց, որ առավոտյան արթնանալուց հետո, երբ պատրաստվել են իջնել ֆիզպատրաստության, տեղեկացրել են, որ կուրսանտներից Հայկազ Բարսեղյանը չկա: Նրանք սկսել են փնտրել կուրսանտին:
«Մինչեւ վազքուղի ես մենակ գնացել եմ, տեսել եմ, որ տարածությունը մեծ է, դժվար այնկողմ մարդ գնար: Հետ գնացի, տեսա, որ ֆուտբոլի դաշտի եզրամասում` ձյան վրա կան ոտնահետքեր` մի հոգու, շարժվեցի դեպի այդ կողմ, տեսա ինչ-որ ստվեր, մտածեցի, որ Հայկազն ա ու ասացի` Հայկազ կմրսես, մի կանգնի այդտեղ, բայց ձայն չհանեց: Ես մոտեցա պտտաձողին, տեսա` կախված է, ինձ թվում էր, որ ուղղակի հենված է սյանը: Բժշկուհին եկավ, ստուգեց պուլսը, տեսավ, որ չկա»,-պատմեց վկան:
Արտավազդ Միրզոյանը նշեց, որ հետագայում լսել է, որ Հայկազ Բարսեղյանին սպանել են Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը:
Մեղադրողը միջնորդություն ներկայացրեց հրապարակել վկայի նախաքննական ցուցմունքը: Դատարանը բավարարեց:
Վկան նախաքննական ցուցմունքում բնութագրելով գործով գործով մյուս ամբաստանյալ Վարազդատ Սաֆարյանին նշել է, որ նա ագրեսիվ է եղել, մինչդեռ դատաքննական ցուցմունքում նշեց, որ Վարազդատ Սաֆարայնը լավ վարքագիծ է ունեցել, կուրսանտները նրան հարգել են: Նախաքննական ցուցմունքում վկան նշել է, որ Վարազդատ Սաֆարյանը դասակի հրամանատարի տեղակալ է եղել եւ սպաների հետ լավ հարաբերությունների մեջ է եղել, մնացածների հետ շատ ագրեսիվ է եղել: Եթե նրա հրամանները չեն կատարվել` ֆիզիկական բռնության է դիմել, հայհոյել է նրան:
Հաջորդ դատական նիստը տեղի կունենա հուլիսի 17-ին:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում։
