Հայտնի փաստաբան Տիգրան Աթանեսյանի գրասենյակում փաստաբանների միջեւ ծեծկռտուքի փաստով հարուցված քրեական գործով 5 անձի մեղադրանք է առաջադրվել: Այս մասին NEWS.am-ին ասաց Քննչական կոմիտեի նախագահի խորհրդական Սոնա Տռուզյանը:

Փաստաբան Արմեն Սողոմոնյանին, Փաստաբանների պալատի նախագահի խորհրդականներ Գեւորգ Մկրտչյանին ու Վրեժ Խաչիկյանին, Փաստաբանների դպրոցի տնօրեն Սիմոն Բաբայանին եւ Արսեն Հարությունյանին տարբեր մեղադրանքներ են առաջադրվել: Նրանց մեղադրանքներ է առաջադրվել Քրեական օրենսգրքի 113-րդ, 117-րդ եւ 118-րդ հոդվածի հատկանիշներով: Բոլորի նկատմամբ խափանման միջոց է ընտրվել երկրից չհեռանալու մասին ստորագրությունը: Նշենք, որ Տիգրան Աթանեսյանը գործով որպես մեղադրյալ վաղը հրավիրվել է հարցաքննության:

Հիշեցնենք, որ ապրիլի 27-ին Տիգրան Աթանեսյանն ու Արմեն Սողոմոնյանը հարձակման էին ենթարկվել Փաստաբանների դպրոցի տնօրեն, խորհրդի անդամ Սիմոն Բաբայանի, ՓՊ նախագահի խորհրդականներ Վրեժ Խաչիկյանի, Գեւորգ Մկրտչյանի եւ փաստաբան Արսեն Հարությունյանի կողմից։ Աթանեսյանն ու նրա ընկերները հարձակման պատասխանատու համարում են ՓՊ նախագահ Արա Զոհրաբյանին։