Դերասան Վլադիմիր Էտուշը վերակենդանացման բաժանմունքում է: Այս մասին ՏԱՍՍ-ին հայտնել է Մոսկվայի արտակարգ ծառայություններում աղբյուրը: «Վ. Էտուշը դեռեւս նեյրովիրաբուժության վերակենդանացման բաժանմունքում է, ջերմությունը նորմալ է` 36,6»,- ասել է գործակալության զրուցակիցը:
Ավելի վաղ հաղորդվել է, որ ԽՍՀՄ ժողովրդական արտիստ, 95-ամյա դերասան Վլադիմիր Էտուշը պոլիկլինիկայի մոտ աստիճանների վրա ընկնելուց հետո հոսպիտալացվել է Սկլիֆոսովսկու անվան շտապ օգնության ԳՀԻ-ում:
Վլադիմիր Աբրամովիչ Էտուշը ծնվել է 1922 թվականի մայիսի 6-ին Մոսկվայում, սակայն անձնագրում ծննդյան տարեթիվը նշված է 1923 թվականի մայիսի 6: Դպրոցն ավարտելուց անմիջապես հետո ընդունվելով Թատերական ուսումնարան` 1941 թվականի սեպտեմբերին Էտուշը կամավոր ճակատ է մեկնել: 1943 թվականին Զապորոժիեի մոտ ծանր վիրավորվել է: Հոսպիտալից դուրս գրվելուց հետո հաշմանդամության 2-րդ կարգ է ստացել եւ ծառայությունից ազատվել է: 1944 թվականին վերադարձել է Շչուկինի անվան թատերական ուսումնարանի 4-րդ կուրս:
Վլադիմիր Էտուշը թատերական ուսումնարանն ավարտել է 1945 թվականին եւ հրավիրվել այնտեղ դասավանդելու: Նույն թվականից նա սկսել է աշխատել Մոսկվայի Վախթանգովի անվան թատրոնում, որի հետ է կապված նրա ամբողջ կյանքը: