Երեւանի հին փողոցների կառուցապատման ընթացքում («Հին Երեւան» նախագիծ) Հայաստանի առաջին հանրապետության հիմնադիր Արամ Մանուկյանի տունը կպահպանեն։ Այս մասին հունիսի 27-ին հայտարարեց ՀՀ Կառավարությանն առընթեր Քաղաքաշինության պետկոմիտեի նախագահ Նարեկ Սարգսյանը՝ 2016 թվականի պետբյուջեի կատարողականի մասին քննարկումներում ելույթ ունենալով, որոնք տեղի են ունենում խորհրդարանական մշտական հանձնաժողովներում։
Բացի այդ, նրա հավաստմամբ՝ կվերականգնեն Տերյանի փողոցից ապամոնտաժված Աֆրիկյանների տունը։ «Հին Երեւան»-ի վերջնական նախագիծը շուտով կհաստատեն Քաղաքաշինության պետական կոմիտեն, ՀՀ Մշակույթի նախարարությունն ու Երեւանի քաղաքապետարանը։ Շինարարական աշխատանքները կտեւեն 3-3,5 տարի։
Շինարարական աշխատանքները կսկսվեն Աբովյան, Բյուզանդ, Կողբացի եւ Արամի փողոցների միջեւ գտնվող հատվածում։ Այնտեղ նախատեսվում է «վերակառուցել» հին շինությունները (XIX –XX դարեր), որոնք նախկինում ապամոնտաժվել են, իսկ փոխարենը բազմահարկ էլիտար շենքեր են կառուցել։ Սակայն հին շինությունների քարերը համարակալվել եւ պահվել են։ 120-130 մլն դոլար գնահատվող նախագիծը հաստատվել է 2014 թվականին նոյեմբերին։