Կոլումբիայի Հեղափոխական զինված ուժեր (FARC) ձախ արմատական ապստամբ խմբավորման զինյալները հանձնել են իրենց ունեցած ամբողջ գրանցված զենքը՝ 7132 միավոր, փոխանցում է DW-ն։

Պաշտոնական արարողությունը, որով ավարտվելու է զինաթափման գործընթացը, կկայանա Մեսետաս քաղաքում՝ FARC-ի առաջնորդների ու Կոլումբիայի նախագահ Խուան Մանուել Սանտոսի ներկայությամբ։

Զենքը ձուլվելու է, իսկ մետաղից պատրաստելու են հուշարձաններ՝ երկրում քաղաքացիական պատերազմի զոհերի հիշատակին։ Դրանք կտեղադրվեն Կոլումբիայում, Նյու Յորքում ու Հավանայում, որտեղ չորս տարի շարունակվել են իշխանությունների ու ապստամբերի բանակցությունները։

Զինաթափումն իրականացվել է Կոլումբիայի տարածքում գտնվող հատուկ գոտիներում, որտեղ նախկին ապստամբներին պատրաստվում են վերադարձնել նորմալ կյանքի։