«Սասնա ծռեր» խմբի անդամ Արեգ Կյուրեղյանին, դահլիճից հեռացնելիս, խոշտանգել են: Ոստիկանների եւ ամբաստանյալների միջեւ ընդհարումից հետո լրագրողներին ասաց Կյուրեղյանի պաշտպան Արա Ղարագյոզյանը, փոխանցում է NEWS.am-ի թղթակիցը:
Պաշտպանը պատմեց, որ ընդհարումը սկսվել է այն բանից հետո, երբ Արեգ Կյուրեղյանն իրեն թուղթ է փոխանցել, որն էլ ներկա ոստիկաններից մեկը խլել է:
«Իմ պաշտպանյալին տանելուց գցել են գետնին, հարվածել: Այս պահին էլ այնտեղից, որտեղ տարան ամբաստանյալներին, գոռգոռոցներ են գալիս, ենթադրում եմ, որ նրանց ծեծում են»,- ասաց նա:
Պաշտպանը նշեց, որ պատրաստվում է դիմել Մարդու իրավունքների պաշտպանի գրասենյակ եւ ահազանգել ամբաստանյալներին խոշտանգելու մասին:
Հիշեցնենք, որ Երեւանի Ավան եւ Նոր Նորք վարչական շրջանների ընդհանուր իրավասության դատարանում անցկացվող արտագնա նիստն այսօր՝ հունիսի 28-ին, դեռ չմեկնարկած բախում է տեղի ունեցել ամբաստանյալների եւ ոստիկանների միջեւ: Ոստիկանները բռնի ուժով հեռացրել են ամբաստանյալներ Արեգ Կյուրեղյանին, Մխիթար Ավետիսյանին եւ Սմբատ Բարսեղյանին: Այս ամենը տեսնելով՝ դահլիճում գտնվող հարազատները սկսել են գոռգոռալ եւ հարվածել ապակիներին: Կարգադրիչները հեռացրել են հարազատներից մի մասին:
Ժամը 11:00-ին նշանակված դատական նիստը դեռ չի սկսվել: Նշենք, որ գործը քննվում է Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում, սակայն նիստերն անցկացվում են արտագնա Ավան եւ Նոր Նորք վարչական շրջանների ընդհանուր իրավասության դատարանում, որտեղ հատուկ ապակեպատ դահլիճ են սարքել:
