ԵԱՀԿ Մինսկի խմբի շրջանակներում ղարաբաղյան խնդրի խաղաղ կարգավորմանն այլընտրանք չկա: Այս մասին, այսօր՝ հունիսի 28-ին,Եվրոպայի խորհրդի խորհրդարանական վեհաժողովի ամառային նստաշրջանի լիագումար նիստում ունեցած իր ելույթում նշել է հայկական պատվիրակության ներկայացուցիչ, ՀՀ ԱԺ նախագահի տեղակալ Միքայել Մելքումյանը:
Նա, մասնավորապես, նշել է.
«Հայաստանի համար փախստականների խնդիրը նույնպես շատ կարեւոր է եւ արդիական՝ Սիրիայից ներգաղթող փախստականների առումով: Այսօր կարելի է ասել, որ Հայաստանն ընդունել է ավելի քան 22000 փախստականների: Սակայն մենք պետք է այսօր ոչ միայն քննարկենք, այլեւ գտնենք համարժեք լուծումներ, այդ թվում՝ Եվրապայում եւ այլ երկրներում համանման իրավիճակների լուծման նպատակով:
Այդ գործընթացին գնահատականներ տալու համար նույնիսկ մենք չունենք համապատասխան գործիքներ, որովհետեւ տարբեր երկրներում, կախված փախստականների թվաքանակից, նրանց՝ տեղում հարմարվելու պայմաններից, սոցիալական, կրթական, առողջապահական եւ այլ կենսաապահովման խնդիրների լուծման ծախսերի միջեւ կան հսկայական տարբերություններ: Ուստի մենք պետք է ունենանք գնահատման համարժեք մեխանիզմներ:
Հայաստանին հաջողվել է լուծել Սիրիայից ներգաղթած փախստականների կրթական, աշխատանքին հարմարվելու, ավելին՝ աշխատանքի տեղավորման շատ հարցեր՝ առանց արտաքին ֆինանսավորման աղբյուրների: Սակայն բոլոր տարածաշրջաններում էլ, այդ թվում եւ Հայաստանում անհնար կլինի լուծել վերը նշված բոլոր հարցերը առանց կայուն տարածաշրջանի առկայության:
Ուստի ես գտնում եմ, որ այդ թվում ԼՂՀ եւ ադրբեջանական սահմանին տիրող վերջին իրադարձությունները այլընտրանք չունեն, քան ԵԱՀԿ Մինսկի խմբի շրջանակներում խնդրի խաղաղ կարգավորումը:
Այդ նպատակով առավել քան արդիական է մնում կոնֆլիկտի շփման գծի ողջ երկայնքով հրադադարի ռեժիմի խախտումներն արձանագրող տեխնիական միջոցների անհապաղ տեղաբաշխումը: