Եվրոպայի խորհրդի խորհրդարանական վեհաժողովի նախագահ Պեդրո Ագրամունտը հեռացվել է Եվրոպական ժողովրդական կուսակցության խմբակցության կազմից: Այս մասին NEWS.am-ի հետ զրույցում նշել է ՀՀ Ազգային ժողովի փոխնախագահ, ԵԽԽՎ-¬ում Հայաստանի պատվիրակության ղեկավար Արփինե Հովհաննիսյանը, ով նաեւ ԵԽԽՎ-ում ԵԺԿ խոսնակն է:
Համապատասխան որոշումը կայացվել է չորեքշաբթի ԵԺԿ պատգամավորների նիստի ժամանակ:
Արփինե Հովհաննիսյանի խոսքով, ԵԺԿ քաղաքական խմբում նիստը թեժ է ընթացել. Ագրամունտին խմբից հեռացնելու որոշումն ընդունվել է 30 կողմ, 0 դեմ, 3 ձեռնպահ ձայներով: Նա նշել է, որ ողջ ադրբեջանական լոբբին պայքարում էր Ագրամունտի համար, պաշտպանում էր նրան եւ ավելին, այն մարդիկ, ովքեր դեմ էին, չեն մասնակցել քվեարկությանը:
Ավելի վաղ NEWS.am-ը հայտնել էր, որ հունիսի 27-ին վեհաժողովի պատգամավորները Ստրասբուրգում ընթացող ամառային նստաշրջանում բանաձեւ էին ընդունել, որը թույլ է տալիս ԵԽԽՎ ղեկավարներին, այդ թվում նախագահ Ագրամունտին անվստահություն հայտնելու գործընթաց սկսել:
Արփինե Հովհաննիսյանը NEWS.am-ին հայտնել էր, որ այդ բանաձեւից հետո Ագրամունտին անվստահություն հայտնելու համար պետք է ստորագրահավաք սկսվի:
