Անցած տարվա հուլիսի 19-ին ոստիկանության մեքենայի ապակին կոտրելու հրահանգներ տալու մեջ մեղադրվող` «Նոր քաղաքական մշակույթ» կուսակցության նախագահ Անի Զախարյանին պաշտպանը խնդրեց արդարացնել:
Երեւանի Կենտրոն եւ Նորք-Մարաշ վարչական շրջանների դատարանում այսօր` հունիսի 28-ին ամբաստանյալի պաշտպանը` Զորայր Հարությունյանը, հայտարարեց, որ առաջադրված մեղադրանքն անհիմն է եւ Անի Զախարյանը պետք է արդարացվի:
«Դատարանին խնդրում եմ կայացնել արդարացման դատավճիռ»,- ասաց պաշտպանը:
Անի Զախարյանն իր խոսքում հայտարարեց, որ ինքը նման կոչեր չի արել, եւ եթե օբյեկտիվ նախաքննություն կատարվեր, գործը դատարան չէր հասնի:
«Նախաքննությունն ընթացել է քննիչի աշխատասենյակում, որը դիսկոտեկ էր հիշեցնում: Այնտեղ բարձր երաժշտություն էր հնչում եւ աշխատողները սուրճ էին խմում եւ զրուցում»,- ասաց Անի Զախարյանը:
Ամբաստանյալը նշեց, որ քննիչն իրեն ասել է, որ մեղադրանք չառաջադրել չի կարող. «Քննիչն ինձ ասաց, որ եթե ինքը մեղադրանք չառաջադրի, իրեն մեղադրանք կառաջադրեն»:
Անդրադառնալով դատաքննությանը` Զախարյանը նշեց, որ դատարանում վկայություն տված 5 ոստիկանների խոսքերն իրականությանը չեն համապատասխանում:
«Ես բացարձակապես անմեղ եմ, հարգելի դատարան, միջադեպի մասին ես համացանցից եմ տեղեկացել: Նախաքննության ընթացքում ես խորը սթրես ապրելով կորցրել եմ իմ երեխային: Այժմ էլ դատաքննության ընթացքում ես կրկին հղի եմ ու մտավախություն ունենալով, որ կարող եմ կորցնել երեխայիս, ամեն շաբաթ դիմել եմ բուժզննման»,- ասաց նա եւ արտասվեց:
Նշենք, որ մեղադրողը պահանջել է մեղավոր ճանաչել Անի Զախարյանին եւ դատապարտել 4 տարվա պայմանական ազատազրկման:
Դատարանը հեռացավ խորհրդակցական սենյակ` դատավճիռ կայացնելու: Այն կհրապարակվի հունիսի 29-ին:
Ըստ մեղադրական եզրակացության` Անի Զախարյանը հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով հնչեցրել է կոչեր եւ դրդել մի խումբ ինքնությունները չպարզված անձանց կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ:
Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին: