Մինչեւ 2019 թվականը Հայաստանում արեւային էլեկտրակայանների հզորությունը կհասնի 110 ՄՎտ-ի: Այս մասին հունիսի 28-ին էներգետիկ ենթակառուցվածքների եւ բնական պաշարների փոխնախարար Հայկ Հարությունյանը հայտարարեց գերմանական KfW բանկի վարկային սեմինարի ժամանակ` կապված «Աջակցություն վերականգնվող էներգիային» ծրագրի հետ:
Նրա խոսքով` արեւային կայանների գեներացիան անկայուն է (կախված արեւի լույսից` կարող է թույլ լինել, սակայն յուրաքանչյուր վայրկյան փոփոխվել), եւ 110 ՄՎտ-ն առավելագույն հզորությունն է, որի դեպքում երկրի ներկայիս էներգահամակարգը կարող է նոր տատանումները «մարսել»: Այդուհանդերձ, նույն 2019-ին կընդլայնվեն Հայաստանի էներգահամակարգի թողունակության կարողությունները: Նոր բարձրավոլտ էլեկտրահաղորդման գծերի շնորհիվ Վրաստանի եւ Իրանի հետ ընդհանուր փոխանցումը կհասնի մոտ 2 հազար ՄՎտ-ի. Իրանի հետ` 350-ից մինչեւ 1000 ՄՎտ-ի, Վրաստանի հետ`ավելի քան 2 անգամ, մինչեւ 1000–1200 ՄՎտ: Այդ դեպքում տատանումներից կարելի է չվախենալ. էներգիայի ավելցուկը կարելի է փոխանցել հարեւաններին, իսկ անհրաժեշտության դեպքում ետ ստանալ: Սա այլընտրանքային էներգիայի համար նոր հզորությունների հնարավորություններ կստեղծի: