«ԱՐԱՐԱՏԲԱՆԿ»-ը տեղաբաշխել է Սեւծովյան առեւտրի եւ զարգացման բանկի (BSTDB)` ՀՀ դրամով պարտատոմսերը: Թողարկման ծավալն է 2 մլրդ դրամ, ժամկետը` 3 տարի, վճարումները` կիսամյակային արժեկտրոններով:
Պարտատոմսերի արժեկտրոնային եկամտաբերությունը 8,455 տոկոս է, դրանք վաճառվել են փոքր պրեմիայով հօգուտ Սեւծովյան բանկի, եւ եկամտաբերությունը ձեւավորվել է 8,3481 տոկոս:
Սա BSTDB-ի առաջին պարտատոմսերի թողարկումն է հայկական դրամով:
Պարտատոմսերը տեղաբաշխվել են Nasdaq OMX Armenia ֆոնդային բորսայում, ընդ որում, ձեռքբերման հայտեր են ստացվել 16 ընկերություններից:
Պարտատոմսերի եկամտաբերությունը փոքր-ինչ ցածր է, քան միջին շուկայական դրույքները դրամով պարտատոմսերի համար, սակայն դրանք միեւնույն է գրավեցին հաճախորդներին` շնորհիվ շատ բարձր հուսալիության: Որպես հետեւանք, պարտատոմսերի պահանջարկը 35%-ով գերազանցել է առաջարկը:
Ինչպես լրագրողների հետ զրույցում նշեց «ԱՐԱՐԱՏԲԱՆԿ»-ի վարչության նախագահ եւ գործադիր տնօրեն Աշոտ Օսիպյանը, հավաքագրված գումարներն օգտագործվելու են Հայաստանի տնտեսության զարգացման, մասնավորապես` հիփոթեքային վարկավորման համար:
«Շատ կարեւոր է, որ մենք կատարել ենք միջազգայնորեն ճանաչված բանկի պարտատոմսերի տեղաբաշխում, որն ունի բարձր` «A» վարկանիշ», - հավելեց նա:
Նոր պարտատոմսերը շուտով պիտի հասանելի դառնան նաեւ ոչ ռեզիդենտ գնորդների համար` շնորհիվ Nasdaq OMX Armenia-ում գործող նոմինալ պահառուի հաշվի:
Բորսայում «ԱՐԱՐԱՏԲԱՆԿ»-ը արդեն երկար փորձ ունի` որպես պարտատոմսերի գործընկեր: Այժմ բանկը գնանշող է հանդիսանում 3 ընկերության համար, այսինքն` պարբերաբար ձեռք է բերում ու վաճառում նրանց պարտատոմսերը:
Ինչպես NEWS.am-ի հետ զրույցում նշեց BSTDB-ի գանձապահ Քրիսթոֆեր Բեսթը, հիփոթեքային վարկավորման արագացումը շահեկան կլինի թե' Հայաստանի հաճախորդների, թե' բանկի համար: «Մենք աշխատում ենք չունենալ բաց արտարժութային դիրքեր: Այնպես որ, պարտք ենք վերցնում հայկական դրամով, բայց այդ գումարը հետագայում, կրկին հայկական դրամով, կուղղվի վարկավորմանը:
Իսկ ընդհանուր առմամբ Հայաստանի ֆինանսական շուկան բավականին հուսալի է, եւ մեր մուտքը Հայաստանի ֆոնդային շուկա ռիսկային չենք համարում», - նշեց նա:
«ԱՐԱՐԱՏԲԱՆԿ» ԲԲԸ-ն Հայաստանի խոշորագույն բանկերից է: 2016-ի արդյունքներով, նրա ակտիվները կազմել են 200,5 մլրդ դրամ` նախորդ տարվա համեմատ ավելանալով 51,8%-ով:
