Հայաստանը եւ Վրաստանը քննարկում են դեպի երրորդ երկրներ ընդհանուր արտահանման հնարավորությունները: Այս մասին նշվել է այսօր՝ հունիսի 29-ին, ՀՀ տնտեսական զարգացման եւ ներդրումների նախարար Սուրեն Կարայանի եւ Վրաստանի Էկոնոմիկայի եւ կայուն զարգացման նախարար Գեորգի Գախարիայի հանդիպման ժամանակ:
Նախարարությունից NEWS.am-ին հայտնում են, որ Սուրեն Կարայանը ողջունել է գործընկերոջը եւ շնորհակալություն հայտնել այցի համար:
Կարայանի խոսքով՝ թեեւ Հայաստանի եւ Վրաստանի միջեւ առեւտրաշրջանառությունը աճում է, սակայն տեմպերը գոհացուցիչ չեն, եւ կա դեռ չիրացված լուրջ ներուժ: Նախարարն առաջարկել է քննարկել այս եւ երկկողմ հետաքրքրություն ներկայացնող այլ հարցեր: Սուրեն Կարայանն առաջարկել է քննարկել եւ մշակել դեպի երրորդ երկրներ համատեղ արտահանմանն ուղղված ծրագրեր՝ հաշվի առնելով Հայաստանի եւ Վրաստանի համար առկա արտոնյալ շուկաները: Նախարարները հաստատել են, որ երկրներից յուրաքանչյուրն ունի իրեն բնորոշ ուժեղ կողմեր եւ մրցակցային առավելություններ, որոնց գրագետ համադրմամբ կարող են արդյունավետ համատեղ ծրագրեր իրականացվել:
Վրաստանի Էկոնոմիկայի եւ կայուն զարգացման նախարար Գեորգի Գախարիան շնորհակալություն է հայտնել ջերմ ընդունելության համար եւ ընդգծել, որ քաղաքական որեւէ տարաձայնության բացակայությամբ պայմանավորված՝ անհրաժեշտ է բոլոր ջանքերն ուղղել առեւտրատնտեսական կապերի ամրապնդմանը:
