Վարչապետ Կարեն Կարապետյանը հանձնարարել է մինչեւ տարեվերջ երկարացնել տեսչական ստուգումների մորատորիումը:
Հունիսի 29-ին` կառավարության հերթական նիստում վարչապետը հիշեցրեց, որ համաձայն կառավարության 2017 թվականի հունվարի 26-ի որոշման` տեսչական ստուգումները սահմանափակված են մինչեւ հուլիսի 1-ը: Վարչապետի խոսքով` սա արվել էր հաշվի առնելով տեսչական բարեփոխումների ընթացքում օպտիմալացման աշխատանքները, ինչպես նաեւ տնտեսվարող սուբյեկտներին ստուգումների բեռից ազատելու անհրաժեշտությունը:
«Ձեւակերպումը շատ հետաքրքիր է` գրված է «որոշակի ժամանակահատվածում»: Ամեն դեպքում, կառավարության աշխատակազմի ղեկավար Վահե Ստեփանյանին հանձնարարում եմ հաջորդ նիստին ներկայացնել մինչեւ տարեվերջ մորատորիումը երկարացնելու մասին համապատասխան որոշման նախագիծ»,- նշեց Կարապետյանը:
Նրա խոսքով` ստուգումների ժամանակավոր դադարեցումը հետապնդում է բիզնեսին ոչ անհրաժեշտ տեսչական միջամտությունից խուսափելու նպատակ: «Սակայն ստուգումների սահմանափակումը չի տարածվում բարձր ռիսկի խմբում գտնվող տնտեսվարող սուբյեկտների վրա: Այսինքն` ստուգումները կշարունակվեն այն բոլոր դեպքերում, երբ խոսքը վերաբերում է մարդու կյանքի եւ առողջության, հասարակական անվտանգության եւ մյուսների իրավունքների սպառնալիքներին: Դուք տեղյակ եք, որ տեսչությունների բարեփոխումներ են անցկացվում, եւ առաջիկա 2-3 ամիսներին մենք նոր համակարգ կստեղծենք, որը գործողից կտարբերվի: Այնտեղ օպտիմալացում կկատարվի, տեսչական համակարգերի միավորում, աշխատանքը կկառուցեն փոքր-ինչ այլ փիլիսոփայությամբ: Այս պատճառով մենք նման որոշման ենք հանգել մինչեւ նշված համակարգի ստեղծումը եղած ժամանակահատվածի համար»,- ընդգծեց Կարեն Կարապետյանը:
