Թուրքիայի մեջլիսում քեմալական Հանրապետական ժողովրդական կուսակցությունից ընտրված հայ պատգամավոր Սելինա Դողանը Պոլսո Հայոց պատրիարքարանում այցելել է պատրիարքական տեղապահ Գարեգին արքեպիսկոպոս Բեքչյանի հետ:
Դողանը այս մասին գրել է Facebook-ի իր էջում, նշելով. «Տեղապահի պաշտոնը ստանձնած Սրբազան Գարեգին արքեպիսկոպոս Բեքչյանին շնորհավորեցի՝ այցելելով նրան: Քննարկումներ ունեցանք օրակարգային զարգացումների շուրջ: Ցանկանում եմ, որ պատրիարքի ընտրությունը մեր երկրի ու համայնքի համար բարի լինի»:
Ավելի վաղ NEWS.am-ը հայտնել էր, որ Պոլսո Հայոց պատրիարքարանի եկեղեցական ընդհանուր ժողովը հունիսի 28-ին որոշում է կայացրել դադարեցնել Արամ արքեպիսկոպոս Աթեշյանի լիազորությունները որպես պատրիարքական փոխանորդ: Որոշումը կայացվել է 22 կողմ եւ 2 դեմ եւ 1 ձեռնպահ ձայներով:
Պատրիարքի տեղապահ ընտրված Գարեգին արքեպիսկոպոս Բեկչյանը նախ կոչ է արել Արամ Աթեշյանին ներկայացնել իր հրաժարականի գրավոր դիմումը՝ որպեսզի Պատրիարքական ընտրությունները ունենան առողջ գործընթաց եւ կանխվեն հավանական սխալ հասկացողությունները: Մինչդեռ Արամ արքեպիսկոպոս Աթեշյանը հայտարարել էր, որ մտադիր չէ հրաժարական ներկայացնել:
Ամենայն հավանականությամբ Պոլսո պատրիարքի ընտրությունները տեղի կունենան այս տարվա աշնանը:
