«Սասնա ծռեր» խմբի անդամ Արայիկ Խանդոյանի կնոջն այսօր՝ հունիսի 29-ին, թույլ չեն տվել տեսակցել նրան: Լրագրողների հետ զրույցում նրա կինը՝ Անուշ Խանդոյանը, նշեց, որ այսօր եղել է ամուսնուն տեսակցելու օրը, սակայն, եկել է «Նուբարաշեն» ՔԿՀ եւ նրան թույլ չեն տվել մտնել տեսակցության:
«Ասացին, որ չես կարող մտնել՝ նշելով, որ պաշտպանը՝ Արայիկ Պապիկյանը մոտն է, նաեւ ամբողջ օրվա ընթացքում ՄԻՊ աշխատակիցներն են տեսակցում նրան: Ինչի՞ պետք է թույլ տան, եթե այդպիսի դաժանությամբ երեկ ծեծի են ենթարկել»,-ասաց Անուշ Խանդոյանը:
Նա նշեց, որ Արայիկ Խանդոյանին կփորձի տեսակցել վաղը՝ հունիսի 30-ին:
Հիշեցնենք, որ «Սասնա ծռերի» գործով դատական նիստին հունիսի 28-ին, բախում էր տեղի ունեցել ամբաստանյալների եւ ոստիկանների միջեւ: Ոստիկանները բռնի ուժով հեռացրել էին ամբաստանյալներ Արեգ Կյուրեղյանին, Մխիթար Ավետիսյանին եւ Սմբատ Բարսեղյանին: Այս ամենը տեսնելով՝ դահլիճում գտնվող հարազատները սկսել էին գոռգոռալ եւ հարվածել ապակիներին: Կարգադրիչները հեռացրել էին հարազատներից մի մասին: Պաշտպանները ավելի ուշ ահազանգել են, որ իրենց պաշտպանյալներին դատարանի նկուղում ծեծի են ենթարկել: