Մոսկվայի շրջանային ռազմական դատարանում ատենակալների կոլեգիան մեղավոր է ճանաչել ընդդիմադիր գործիչ Բորիս Նեմցովի սպանության դրվագով 5 ամբաստանյալներին, փոխանցում է «Ինտերֆաքսը»:
Ատենակալների վճռի համաձայն` քիլեր Զաուր Դադաեւը, ինչպես նաեւ Անզոր Գուբաշեւը` Գրոզնիում ձերբակալելիս զոհված Բեսլան Շավանովի հետ միասին անմիջական մասնակցություն են ունեցել 2015 թվականի փետրվարի 27-ին, մոտ ժամը 23:31-ին Մեծ Մոսկվորեցկյան կամրջի հետիոտնային հատվածում Նեմցովի սպանության կատարմանը` նրան նույն օրը գաղտնի հետեւելով:
Իրենց հերթին, Շադիդ Գուբաշեւը, Թեմիրլան Էսքերհանովը եւ Համզաթ Բահաեւը մասնակցել են սպանության նախապատրաստմանը: Գուբաշեւը հանցագործության անմիջական կատարողների հետ միասին նույնպես հետեւել է Նեմցովին, իսկ Էսքերհանովը եւ Բահաեւը դա կատարել են հեռու տարածությունից: Սպանությունից հետո երեքն էլ, ինչպես կարծում են ատենակալները, անմիջական կատարողներին օգնել են իրավապահ մարմիններից թաքնվել: