Նախագահ Սերժ Սարգսյանն այսօր կառավարություն էր գնացել: Նրան դիմավորելու էր դուրս եկել նաեւ վարչապետ Կարեն Կարապետյանը: Արդեն նիստերի դահլիճում նախագահը շնորհավորել է կառավարության անդամներին նշանակվելու կապակցությամբ եւ խոսել գործադիրի առջեւ դրված խնդիրների մասին: Սերժ Սարգսյանը նախ ընդգծել է, որ խորհրդարանական ընտրությունների արդյունքում վստահության քվե ստացած թիմը միասնական է եւ լիարժեք վստահում է Կարեն Կարապետյանի գլխավորած կառավարությանը:
Ինչ վերաբերում է գործադիրի գործունեությանը. այստեղ կարեւորագույն չափանիշը, Սերժ Սարգսյանի խոսքով, պետք է լինի թափանցիկությունը: Կառավարության անդամներին նախագահը հասարակության հետ ակտիվ աշխատելու կոչ է արել: Փորձը ցույց է տալիս, որ միայն այդ դեպքում են բարեփոխումները հաջողություն ունենում: Թեեւ խոստովանել է, որ շատ փոփոխություններ հասարակությունը դժկամությամբ է ընդունել: Բարեփոխումների մասին խոսելիս նախագահը նաեւ չինական ասացվածքն է հիշել:
Կարեն Կարապետյանը նախագահին վստահեցրել է, որ կառավարությունն իրագործելու է ներկայացրած ծրագիրը, թեեւ գիտի, որ դա հեշտ չի լինելու: Կառավարության շենքից հեռացող Սերժ Սարգսյանից լրագրողները փորձել են հետաքրքրվել ապագայի ծրագրերի մասին. արդյո՞ք 2018 թվականին՝ նախագահական լիազորությունները վայր դնելուց հետո, կգլխավորի գործադիր մարմինը:
«Սասնա ծռեր»-ի անդամ Արայիկ Խանդոյանի փաստաբաններն ահազանգում են, որ Ավան եւ Նոր Նորքի դատարանի նկուղում ոստիկանները ծեծել են իրենց պաշտպանյալին: Փաստաբան Արայիկ Պապիկյանն այսօր տեսակցել է Խանդոյանին: Հավաստում է, որ նա շատ վատ վիճակում է, բազմաթիվ մարմնական վնասվածքներ ունի: Պապիկյանը պնդում է նաեւ, որ իր պաշտպանյալը հարվածների արդյունքում ուղեղի ցնցում է ստացել:
Խանդոյանն իրեն այցելած փաստաբանին պատմել է, որ իրենից բացի՝ ծեծել են նաեւ «Սասնա ծռեր»-ից Արեգ Կյուրեղյանին, Մխիթար Ավետիսյանին եւ Սմբատ Բարսեղյանին: Պաշտպանները հանցագործության վերաբերյալ հաղորդում են ներկայացրել Քննչական ծառայություն, իսկ Արայիկ Խանդոյանին եւ «Սասնա ծռեր»-ի մյուս անդամներին այցելել են նաեւ ՄԻՊ աշխատակիցները: Փոխարենն Արայիկ Խանդոյանի մոտ չեն թողել տեսակցության եկած կնոջը՝ Անուշ Խանդոյանին:
Անի Զախարյանն այսօր 2 տարվա պայմանական ազատազրկման դատապարտվեց: Նրան մեղադրում են Խորենացի փողոցում անցյալ տարվա հուլիսի 19-ին ոստիկանության մեքենայի ապակին կոտրելու հրահանգ տալու համար: Դատարանը, սակայն, վճռեց պատիժը պայմանականորեն չկիրառել ու փորձաշրջան սահմանել: Դատավորը, ի դեպ, հաշվի առավ նաեւ հանգամանքը, որ Զախարյանը հղի է: Դատավճռի հրապարակումից հետո Անի Զախարյանը լրագրողներին հայտարարեց, որ բողոքարկելու է այն. ասաց՝ իր համար սա արդեն պատվի ու հեղինակության հարց է:
Համացանցում ակտիվորեն քննարկվում է Facebook-ի օգտատերերից մեկի հրապարակած տեսանյութը: Հրապարակման հեղինակի հավաստմամբ՝ Մաշտոց-Խորենացի փողոցների խաչմերուկում քաղաքացիական հագուստով եւ ոստիկանի համազգեստով անձինք ոտքով հարվածել ու թափել են ծիրան վաճառող տարեց կնոջ արկղերի պարունակությունը, հետո նստել ոստիկանության մեքենան ու հեռացել: Արկղերին հարվածելու կադրեր տեսանյութում չկան, բայց երեւում է ամբողջ մայթին թափված միրգը: Ավելի ուշ ոստիկանության հասարակայնության հետ կապերի վարչության պետ Աշոտ Ահարոնյանն արձագանքել է հրապարակմանը՝ հավաստելով, որ ուսումնասիրում են «ոստիկանության եւ Երեւանի քաղաքապետարանի կողմից համատեղ իրականացված միջոցառման ընթացքում տեղ գտած միջադեպը»:
Հունիսի 29-ին դոլարն ու եվրոն շարունակել են ամրապնդել դիրքերը: Դոլարի փոխարժեքն արդյունքում կազմել է 480 դրամ, եվրոյինը՝ 548, ռուբլունը՝ 8 դրամ 14 լումա, ֆունտինը՝ 623 դրամ:
Հունիսի 30-ին հանրապետության հյուսիսային որոշ շրջաններում դարձյալ անձրեւ է սպասվում: Օդի ջերմաստիճանը վաղը 2-3 աստիճանով կնվազի: Երեւանում նույնպես առանձին հատվածներում հնարավոր են տեղումներ: Մայրաքաղաքում գիշերը կդիտվի +20+22, ցերեկը՝ +35+36 աստիճան տաքություն:
