Երեւանի Շենգավիթ վարչական շրջանի ընդհանուր իրավասության դատարանում այսօր` հունիսի 30-ին, Սեֆիլյանի եւ մյուսների գործով նիստին դատարանը դատական սանկցիա կիրառեց Ժիրայր Սեֆիլյանի եւ Ներսես Պողոսյանի նկատմամբ` նրանց 10 ժամով դատական նիստերի դահլիճից հեռացնելով: Ներսես Պողոսյանն եւ Ժիրայր Սեֆիլյանը ոտքի չկանգնեցին դատարանի` դահլիճ մտնելու ընթացքում, որի պատռաճով էլ նրանց նկատմամբ դատական սանկցիա կիրառվեց: Ժիրայր Սեֆիլյանը տեղից արձագանքեց. «Մեր իրավունքին ոչ ոք չի կարող բռնանալ»:
Բացի այդ, դատական նիստերի դահլիճում չէր Գեւորգ Սաֆարյանի շահերի պաշտպան Տիգրան Եգորյանը: Դատարանը արձանագրեց, որ պաշտպանը առանց նախազգուշացնելու լքել է նիստերի դահլիճը: Նա հեռացավ խորհրդակցական սենյակ` Տիգրան Եգորյանի նկատմամբ դատական սանկցիա կիրառելու մասին որոշում կայացնելու: Նիստը կրկին ընդմիջվեց:
Նշենք, որ այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն արվում են արտագնա` Շենգավիթ վարչական շրջանի ընդհանուր իրավասության դատարանում:
Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:
