Երեւանի Շենգավիթ վարչական շրջանի ընդհանուր իրավասության դատարանում այսօր` հունիսի 30-ին, Սեֆիլյանի եւ մյուսների գործով նիստին դատարանը դատական սանկցիա կիրառեց փաստաբաններ Տիգրան Հայրապետյանի եւ Արայիկ Պապիկյանի նկատմամբ: Դատարանը կդիմի Փաստաբանների պալատ փաստաբաններին պատասխանատվության ենթարկելու պահանջով:
Այսօրվա դատական նիստը ուղեկցվեց բազմաթիվ ընդմիջումներով: Դատական սանկցիաներ կիրառվեցին եւ գործով ամբաստանյալների, եւ նրանց շահերի պաշտպանների նկատմամբ: 10 ժամով դատական նիստերի դահլիճից հեռացվեցին Գեւորգ Սաֆարյանը, Ժիրայր Սեֆիլյանը, Ներսես Պողոսյանը եւ Հրայր Թոփչյանը:
Նիստի վերջում դատարանի դահլիճում էին մնացել միայն ամբաստանյալներ Հովհաննես Պետրոսյանն եւ Սասունիկ Կիրակոսյանը եւ նրանց շահերի պաշտպաններ` Արսեն Մկրտչյանն ու Կարեն Հակոբյանը:
Հիշեցնենք, որ դատարանը նաեւ դատական սանկցիա էր կիրառել Գեւորգ Սաֆարյանի պաշտպանի` Տիգրան Եգորյանի նկատմամբ:
Դատական նիստը հետաձգվեց, հաջորդ նիստը տեղի կունենա հուլիսի 4-ին, ժամը 11-ին:
Նշենք, որ այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն արվում են արտագնա` Շենգավիթ վարչական շրջանի ընդհանուր իրավասության դատարանում:
Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար: