Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր` հուլիսի 3-ին, կրկին փորձեցին խուզարկել «Սասնա ծռերի» պաշտպաններին:
«Սասնա ծռեր» զինված խմբի 18 անդամների գործով դատական նիստին դատավորն ընդմիջում հայտարարեց, որ պաշտպանները կարող են ներս մտնել նիստերի դահլիճ: Դատարան մտած պաշտպաններ Ինեսա Պետրոսյանին եւ Մոնիկա Մարգարյանին դատական կարգադրիչները պահանջեցին բացել պայուսակները: Պաշտպանները, սակայն, հրաժարվեցին, որից հետո կարգադրիչները թույլ չտվեցին նրանց ներս մտնել:
Լրագրողների հետ զրույցում երկու պաշտպաններն էլ նշեցին, որ իրենց պայուսակներում ընդամենը բանալիներ եւ ակնոց կա:
Մի քանի րոպեից դատական նիստը կշարունակվի:
Նիստն անցկացվում է արտագնա. Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում քննվող գործով նիստերն անցկացվելու են Երեւանի Ավան եւ Նոր Նորք վարչական շրջանների ընդհանուր իրավասության դատարանում, որտեղ հատուկ «Սասնա Ծռերի» գործը քննելու համար դահլիճն ապակեպատ են դարձրել:
Հիշեցնենք, որ «Սասնա Ծռերի» 14 անդամի գործով նիստերը նույնպես անցկացվում են Ավան եւ Նոր Նորք վարչական շրջանների ընդհանուր իրավասության դատարանում: