Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր` հուլիսի 3-ին, ընդմիջումից հետո հեռացված Սերգեյ Կյուրեղյանը վերադարձավ նիստերի դահլիճ:
Ընդմիջումից առաջ դատավոր Արտուշ Գաբրիելյանը նախազգուշացրեց ամբաստանյալներին, քանի որ նրա մտնելիս հրաժարվել էին կանգնել, իսկ Սերգեյ Կյուրեղյանին էլ հեռացրել էր նիստերի դահլիճից:
Ընդմիջումից հետո ամբաստանյալները կրկին հրաժարվեցին կանգնել: Դատավորը կրկին սանկցիա կիրառեց:
«Կրկին անգամ անհարգալից վերաբերմունք դրսեւորեցին դատարանի նկատմամբ: Բացի Սերգեյ Կյուրեղյանից եւ Արամ Մանուկյանից՝ մյուսների նկատմամբ սանկցիա կիրառել՝ հեռացնելով նիստերի դահլիճից»,- ասաց դատավորը:
Սերգեյ Կյուրեղյանին դատարանը նախազգուշացրեց:
Դատական նիստն ընդմիջվեց 10 րոպեով:
Նիստն անցկացվում է արտագնա. Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում քննվող գործով նիստերն անցկացվելու են Երեւանի Ավան եւ Նոր Նորք վարչական շրջանների ընդհանուր իրավասության դատարանում, որտեղ հատուկ «Սասնա Ծռերի» գործը քննելու համար դահլիճն ապակեպատ են դարձրել:
Հիշեցնենք, որ «Սասնա Ծռերի» 14 անդամի գործով նիստերը նույնպես անցկացվում են Ավան եւ Նոր Նորք վարչական շրջանների ընդհանուր իրավասության դատարանում:
