Այսօր մեկնարկել է «Սասնա ծռեր»-ի 18 անդամի գործով դատավարությունը: Խուզարկության ավանդական պահանջից եւ պաշտպանների հրաժարվելուց հետո փաստաբաններ Ինեսա Պետրոսյանին ու Մոնիկա Մարգարյանին թույլ չեն տվել դատարան մտնել: Իսկ ամբաստանյալներին հարազատները ծափերով են դիմավորել:
Դատավոր Արտուշ Գաբրիելյանը դատական նիստը սկսել է փաստաբանների մեծ մասի բացակայությամբ: Մյուս պաշտպանների՝ նիստը հետաձգելու եւ բոլոր փաստաբանների ներկայությունն ապահովելու պահանջը դատավորն անտեսել է: Ամբաստանյալներից 15-ի նկատմամբ էլ սանկցիա է կիրառվել. դատավորի՝ դահլիճ մտնելիս ոտքի չեն կանգնել: Պատժից խուսափել են միայն Արամ Մանուկյանը, Հովհաննես Հարությունյանը, Թաթուլ Թամրազյանը՝ առողջական խնդիրների պատճառով: Ամբաստանյալներից Սերգեյ Կյուրեղյանը նստած տեղից հայտարարություն է արել ու նախազգուշացում ստացել: Դատավորի հետ կարճատեւ վիճաբանությունից հետո էլ Կյուրեղյանը հեռացվել է դահլիճից: Ավելի ուշ դահլիճից հեռացվել են եւս 15 ամբաստանյալներ: Մինչեւ աշխատանքային օրվա ավարտը տեւած նիստին փաստաբանների եւ ամբաստանյալների մեծ մասն այդպես էլ չի մասնակցել: Դատական հաջորդ նիստը տեղի կունենա հուլիսի 6-ին:
Մեկնարկել է 2017 թվականի ամառային զորակոչը: Կենտրոնական հավաքակայանում էր նաեւ Զինված ուժերի գլխավոր շտաբի պետը: Մովսես Հակոբյանը լրագրողներին տեղեկացրել է մի քանի փոփոխությունների մասին. զինվորական համազգեստը, կոշիկները հիմա ավելի որակով են, նորակոչիկներին էլ արգելում են հավաքակայան սնունդ տանել. բանակն իր զինվորին ապահովում է անհրաժեշտ ամեն ինչով: Ապացուցելու համար նույնիսկ տղաներից մեկին խնդրեց հանել կոշիկն ու գուլպաները՝ լրագրողների ներկայությամբ որակը ստուգելու համար:
Տղաները բարձր, մարտական տրամադրությամբ են ծառայության մեկնում: Հավաստում են. անհրաժեշտության դեպքում պատրաստ են մարտական գործողությունների մասնակցել: Իսկ ծնողների մաղթանքը զորակոչիկներին մեկն է. բարի ծառայություն եւ բարի վերադարձ:
Իսկ Ազգային ժողով գնացած նախարարներից լրագրողները հետաքրքրվել են, թե ինչու նրանց որդիները զինվորական ծառայություն չեն անցել: Դավիթ Լոքյանը հավաստել է, որ որդին՝ Սերգեյ Լոքյանը, առողջական խնդիրներ ունի, բայց փաստեր հրապարակել չի պատրաստվում. անհրաժեշտ բոլոր փաստաթղթերը պաշտպանության նախարարությունում են: Չի ծառայել նաեւ Իգնատի Առաքելյանի որդին: Պատճառը գյուղնախարարը չի նշել. անձնական է, բարձրաձայնելու ենթակա չէ:
Արարատում մահվան ելքով պատահար է տեղի ունեցել: Օշականի 26-ամյա բնակիչ, պայմանագրային զինծառայող Մկրտիչ Ղահրամանյանը Volkswagen մակնիշի մեքենայով Փոքր Վեդի գյուղի մոտ դուրս է եկել ճանապարհի երթեւեկելի գոտուց, բախվել ճամփեզրի գազատար խողովակի հենասյանը եւ գլխիվայր պտտվելով՝ հայտնվել դաշտում: Ղահրամանյանը կնոջ ու որդու հետ է եղել: 2 տարեկան Արտաշեսը տեղում մահացել է, իսկ զինծառայողն ու կինը՝ 24-ամյա Արմինե Մնացականյանը, հիվանդանոց են տեղափոխվել: Զինծառայողն ընտանիքի հետ Արցախ էր մեկնում, որտեղ ծառայում էր:
Արթիկի մոր եւ մանկան առողջության պահպանման կենտրոնում նորածին երեխա է մահացել: Տղան 1 օրական է եղել: Բուժկենտրոնից տեղեկացնում են, որ երեխան ժամկետից շուտ է ծնվել: Առաջին օգնությունից հետո բուժման նպատակով նորածնին Գյումրի են տեղափոխել, բայց ճանապարհին մահացել է: Նորածնի մահվան փաստով քրեական գործ է հարուցվել՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելու կամ ոչ պատշաճ կատարելու հատկանիշներով: Երեխայի մահվան պատճառը կպարզեն դատաբժշկական փորձաքննության արդյունքում:
Հուլիսի 4-ին եւ 5-ին Հայաստանում բարձր ջերմային ֆոն է սպասվում: Հանրապետության հովտային գոտիներում ցերեկը կանխատեսվում է մինչեւ 40 աստիճան տաքություն, հրդեհի վտանգը չափազանց մեծ է: Օդի ջերմաստիճանն այդ օրերին բարձր կլինի նորմայից 5-6 աստիճանով: Ուլտրամանուշակագույն ճառագայթման ինդեքսը հուլիսի 4-ին կանխատեսվում է 7: Արտակարգ իրավիճակների նախարարությունը խորհուրդ է տալիս 11:00-ից 15:00-ն ընկած ժամանակահատվածում խուսափել արեւի ուղիղ ճառագայթներից:
Հուլիսի 3-ին ամերիկյան արժույթը թանկացել է, եվրոն՝ էժանացել: Դոլարի փոխարժեքն արդյունքում կազմել է 480 դրամ, եվրոյինը՝ 546, ռուբլունը՝ 8 դրամ 11 լումա, ֆունտինը՝ 623 դրամ:
Հուլիսի 4-ին հանրապետությունում սպասվում է առանց տեղումների եղանակ: Օդի ջերմաստիճանը 4-5 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +23+25, ցերեկը՝ +38+40 աստիճան տաքություն:
