Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր` հուլիսի 6-ին, «Սասնա Ծռեր» խմբի 18 անդամների գործով դատական նիստին ամբաստանյալ Արամ Մանուկյանը հայտարարեց, որ չի պատրաստվում մասնակցել դատական նիստին, մինչեւ իր ընկերներին չբերեն նիստերի դահլիճ: Արամ Մանուկյանը նշեց, որ պահանջում է նաեւ, որպեսզի իր պաշտպանը դուրս գա նիստերի դահլիճից եւ ներկա չգտնվի նիստերի դահլիճում: (Ֆոտոռեպորտաժ)

«Մինչեւ մեր ընկերները ներկա չլինեն դատական նիստի դահլիճում, մենք չենք մնա նիստերի դահլիճում: Ես իմ պաշտպանից պահանջում եմ դուրս գալ, չմասնակցել նիստին»,-ասաց նա:

Ամբաստանյալներից Հովհաննես Հարությունյանը եւս ցանկություն հայտնեց լքել նիստերի դահլիճը` նշելով, որ դատավարությունը սարքել են «խաղ ու պար»:

«Մեզ վերաբերվում եք որպես հանցագործների: Նրանք, որոնք լիքը արյուն են թափել ժողովրդի համար, այսօր դատարանում ծեծում եք: Էս դատավարությունը խաղ ու պար է, դուք պետք է կատարեք այն, ինչ ձեզ ասել են: Լիքը հիվանդ տղերք կան, որ հիմա էս շոգին դատարանի պադվալում կանգնած են, իմաստը ո՞րն է, որ բերել եք այստեղ, գոնե նիստերի դահլիճ բարձրացրեք»,-ասաց նա:

Ամբաստանյալներից Թաթուլ Թամրազյանը եւս լքեց դատական նիստերի դահլիճը:

Դատարանը նրանց նկատմամբ դատական սանկցիա կիրառեց: Դատարանը ընդմիջում հայտարարեց:

Այսօրվա նիստին 18 ամբաստանյալներից մասնակցում են միայն 3-ը` դատավոր Արտուշ Գաբրիելյանը նախորդ նիստին վեց ժամով հեռացրել էր «Սասնա Ծռեր» խմբի 18 անդամներից 15-ին. նրանց նկատմամբ դատական սանկցիա էր կիրառվել ոտքի չկանգնելու համար: Դատարանը սանկցիա չէր կիրառել միայն Հովհաննես Հարությունյանի, Թաթուլ Թամրազյանի եւ Արամ Մանուկյանի նկատմամբ` նշելով, որ նրանք առողջական խնդիրներ ունեն եւ կանգնել չեն կարող:

Նշենք, որ Հովհաննես Հարությունյանն այսօր դատարան է ներկայացել Մոնթե Մելքոնյանի նկարով վերնաշապիկով` «Իմ կենացը մի´ խմեք, այլ իմ գործը շարունակե´ք» գրությամբ:

Նշենք, որ այս նիստն անցկացվում է արտագնա. Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում քննվող գործով նիստերն անցկացվելու են Երեւանի Ավան եւ Նոր Նորք վարչական շրջանների ընդհանուր իրավասության դատարանում, որտեղ հատուկ «Սասնա Ծռերի» գործը քննելու համար դահլիճն ապակեպատ են դարձրել:

Հիշեցնենք, որ «Սասնա Ծռերի» 14 անդամի գործով նիստերը նույնպես անցկացվում են Ավան եւ Նոր Նորք վարչական շրջանների ընդհանուր իրավասության դատարանում: