Матч ТВ հեռուստաընկերության մեկնաբան Նոբել Առուստամյանը NEWS.am-ի թղթակից Վերա Մարտիրոսյանի հետ զրույցում պատմել է, թե որ խաղը ավելի շատ տպավորեց իրեն Կոնֆեդերացիաների գավաթի ժամանակ եւ արդյոք Ռուսաստանին հաջողվեց շատ լավ անցկացնել մրցաշարը:
Նոբել, աշխատել ես Կոնֆեդերացիաների գավաթի շատ հանդիպումների ժամանակ: Ի՞նչ տպավորություն թողեց մրցաշարը:
Կոնֆեդերացիաների գավաթը շատ լավ անցավ: Կարծում եմ՝ բոլորը տեսան դա, թե՛ երկրպագուները, թե՛ լրագրողները եւ այն քաղաքների բնակիչները, որտեղ անցկացվում էին խաղերը: Այնտեղ իսկական տոն էր լինում: Հիմա Ռոսւաստանում բոլորը սպասելու են Աշխարհի առաջնության խաղերին, որոնք անցկացվելու են մեկ տարի անց:
Կոնֆեդերացիաների գավաթին ո՞ր քաղաքն էր ամենից լավ պատրաստվել:
Ես եղել եմ երեք մարզադաշտերում՝ «Սպարտակի», Կազանի ու Սոչիի մարզադաշտերում: Իհարկե, ամեն տեղ կան լավ կողմեր ու բացթողումներ: Բայց մթնոլորտի առումով ինձ ամենից շատ դուր եկավ Կազանը: Ես այնտեղ երեք խաղերի եմ եղել ու կարող եմ ասել, որ Կազանն ինձ շատ դուր եկավ:
Ո՞ր խաղն ամենից շատ դուր եկավ:
Իմ մեկնաբանած ամենահետաքրքիր խաղը Պորտուգալիա-Մեքսիկան էր: Դա շատ վառ հանդիպում էր: Բացի այդ, շատ տպավորված էի Պորտուգալիա – Չիլի կիսաեզրափակչով:
Ռուսաստանում անցկացված մրցաշարը տարբերվո՞ւմ էր նախորդներից:
Այս Կոնֆեդերացիաների գավաթը գլոբալ առումով մեծ բանով չտարբերվեց: Այն տոն էր երկրպագուների համար: Հուսամ՝ եկող տարի Աշխարհի առաջնության խաղերին շատ հայեր կգան:
