Հայաստանում քիչ փող չկա, պարզապես այն վախենում են ներդնել։ Այս մասին հուլիսի 6-ին ԱԺ-ում ասել է «Ծառուկյան» դաշինքից փոխխոսնակ Միքայել Մելքումյանը, 2016-ի պետբյուջեի կատարման մասին հաշվետվության քննարկումների ժամանակ։
Հայաստանում վստահություն չկա օրենքի գերակայության ու սեփականության անձեռնմխելիության հարցում, հավելել է նա։
Խոսելով անձեռնմխելիության մասին, պետք չէ կարծել, թե բիզնեսը հարկադրաբար «կքամեն»։ Բայց իշխանությունների համար անցանկալի բիզնեսի համար այնպիսի պայմաններ կստեղծեն, որ այն ինքը կհեռանա, հավելեց պատգամավորը։
«Կարծո՞ւմ եք՝ Հայաստանում քի՞չ փող կա։ Շատ լավ էլ կա։ Պարզապես այդ փողը վախենում են ներդրումների վերածել։ Մենք պետք է պայքարենք տնտեսության նման անապատացման դեմ։ Ցավոք, 2016-ի պետբյուջեի կատարումը չի լուծել այդ խնդիրը։ Դրա համար էլ մենք Կառավարության այս հաշվետվության օգտին չենք քվեարկի»,- ասել է Մելքումյանը։
