Շփման գծում լարվածության միակ պատասխանատուն Ադրբեջանն է։ Այդ մասին այսօր՝ հուլիսի 6-ին ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի քարտուղար Էդուարդ Շարմազանովը։
Նա շփման գծում վերջին իրադարձությունները բացատրում է այն հանգամանքով, որ բանակցություններում Ադրբեջանը մտել է փակուղի, չի կարողանում քաղաքական կամք գտնել իրականացնելու պարտավորվածությունները, եւ առիթներ է փնտրում լարումներ մտցնելու։ «Երկու կողմերի բոլոր զոհերի պատասխանատուն եւ մեղավորը Ադրբեջանի քաղաքական ղեկավարությունն է։ Երեկվա դեպքի հետ կապված էլ նույնը կասեմ, որ միակ մեղավորը դա Ադրբեջանի ռազմաքաղաքական ղեկավարությունն է․ Անթույլատրելի է սեփական քաղաքացիներին դարձնել վահան, ապա թաքնվել նրանց թիկունքում՝ փորձելով քո սեփական ահաբեկչական էությունը քողարկել»,- նշել է Շարմազանովը։
Նրա կարծիքով, միջազգային հանրության հայտարարությունները բավական հավասարակշռված են, եւ այդ առումով Ադրբեջանի ցանկությունները ձախողվել են։ «Կան տեսանյութեր, մեր զինուժը հրապարակել է դրանք, եւ մենք ունենք հստակ ապացույցներ։ Ապակե տան մեջ ապրողը դիմացինի վրա քար չի նետում»,- ասել է նա։
ՀՀԿ խոսնակը չի բացառում, որ Ադրբեջանի վերջին օրերի վարքը կապված է նաեւ բուլղարական մամուլում հայտնված սենսացիոն տվյալների հետ, որ Ադրբեջանը զենք է առաքել ահաբեկիչներին։