Առաջին անգամ չէ, որ ադրբեջանցիներն իրենց կրակակետերը տեղակայում են բնակավայրերին մոտ: Այս մասին հուլիսի 7-ին կայացած լրագրողների հետ հանդիպմանը ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Նրա կարծիքով` այսպիսով ադրբեջանական բանակը խաղաղ բնակչությամբ է պատսպարվում եւ, փաստորեն, մարդկանց նշանակետի է վերածում: «Այս անգամ երեխա է զոհվել: Բայց ես կրկնում եմ` ոչ մի նոր բան տեղի չի ունեցել: Եվ ես շատ եմ վախենում, որ նման գործողությունները կկրկնվեն»,- ասաց փորձագետը:
Ինչպես նշեց Կովկաս ինստիտուտի տնօրենը, Հայաստանում կխոսեն այն մասին, որ խաղաղ բնակավայրերի անմիջական մերձակայքում երկարաժամկետ կրակակետերի տեղակայումը լուրջ խախտում է, սակայն ադրբեջանական հասարակության աննշան մասը կլսի կամ գոնե կկարդա այդ մասին: «Ակնհայտ է, որ Ադրբեջանում կցուցադրեն զոհված երեխայի լուսանկարները, որը էթիկայի խախտում է, սակայն ներքին իմիջի հարցում Բաքվի իշխանությունները վատ չեն աշխատում»,- եզրափակեց Իսկանդարյանը: